मुंबई - शिवसेनेकडून देण्यात आलेल्या वचन नाम्यातील वचने ही खोटी आहेत. १० रुपयांमध्ये जेवण त्याचप्रमाणे आरोग्य चाचणी ही १ रुपयात करणार ही सर्व आश्वासने जनतेची दिशाभूल करण्यासारखी आहेत, अशी प्रतिक्रिया काँग्रेसच्या चरण सिंग सप्रा यांनी दिली आहे.
हे सगळे शिवसैनिक खोटारडे आहेत. त्यांची सर्व आश्वासने ही जनतेची दिशाभूल करणारे षड्यंत्र आहे. जनता याकडे जास्त लक्ष देणार नसल्याचेही सप्रा म्हणाले. सेनेकडून असाच नामा मागील निवडणुकींमध्ये प्रसिद्ध करण्यात आला होता. त्यामध्ये १ रुपयात झुणका भाकर मिळणार असे शिवसेनेकडून सांगण्यात आले होते. झुणका भाकर तर सुरू झाले, मात्र ते फक्त जागा हडपण्यासाठी आश्वासनांचा जुमला होता असे सप्रा म्हणाले.
हेही वाचा - मुंबईच्या ग्रँट रोड परिसरातील आदित्य आर्केडला भीषण आग, अग्निशमनचे २ जवान जखमी
आता मुंबईतून झुणका-भाकर हद्दपार झाली आहे. शिवसेना हे फक्त लोकांच्या भावनेशी खेळ करून त्यांची दिशाभूल करते. त्यामुळे शिवसेनेकडून देण्यात आलेला आजचा वचननामा म्हणजे जनतेची फसवणूक आहे. त्यांच्या जाहीरनाम्याचा कोणताच फरक जनतेवर पडणार नाही व त्यांच्या थापांना आता जनता भुलणार नाही असं मत मुंबई उपाध्यक्ष चरणसिंग सप्रा यांनी व्यक्त केले.
हेही वाचा - महायुतीचा अधिकृत उमेदवार म्हणून मतदार माझ्या पाठीशी - महापौर विश्वनाथ महाडेश्वर
