मुंबई - उरण येथील ओएनजीसी गॅस प्रकल्पात तांत्रिक बिघाड झाल्यामुळे मुंबईतील सीएनजी गॅस पुरवठा शुक्रवारपासून विस्कळीत झाला आहे. याचा फटका चेंबूरमधील रिक्षाचालकांनाही बसला आहे. सीएनजी केंद्रावर लवकर गॅस मिळत नसल्याने याचा रिक्षाचालकांच्या व्यवसायावर परिणाम झाला आहे. गॅसच्या तुटवड्यामुळे रिक्षाचालकांना 100 रुपये जास्त मोजावे लागत आहेत.
मुंबईतील सीएनजी गॅस तुटवड्याचा रिक्षाचालकांना फटका उरणच्या गॅस प्रकल्पातून मुंबईतील महानगर गॅस लिमिटेडला सीएनजीचा पुरवठा केला जातो. शुक्रवारी सांयकाळी गॅस प्रकल्पात तांत्रिक बिघाड झाला. महानगर गॅस लिमिटेडच्या गॅस पुरवठा प्रकल्पांना मिळणारा गॅस कमी दाबाने सुरू आहे. वडाळा येथील गॅस केंद्रावर याचा परिणाम झाला. त्यामुळे शहरातील व उपनगरातील अनेक सीएनजी केंद्रावर आज गॅस मिळत नव्हता. दोन दिवसांपूर्वी मी 150 रुपयांचा गॅस रिक्षात भरायचो, पण आता 100 रूपये जास्त मोजावे लागत आहे. गॅस कोणता आहे हे देखील समजत नाही, कारण रिक्षा चालताना मधेच बंद पडते. प्रवासी आमच्यावरच चिडचिड करत आहेत, असे पेट्रोल पंपावर सिएनजी भरण्यासाठी आलेले रिक्षा चालक कृष्णा पवार यांनी सांगितले.
