मुंबई - शिवसेना भवन येथे सोमवारी मुख्यमंत्री उद्धव ठाकरे यांनी शिवसेनेच्या जिल्हा प्रमुख आणि तालुका प्रमुख यांची बैठक घेतली. या बैठकीत अधिवेशनात शेतकरी आणि सामान्य नागरिकांसाठी जे काही निर्णय घेण्यात आले, ते लोकांपर्यंत पोहचवण्याचे आदेश मुख्यमंत्री ठाकरेंनी जिल्हा आणि तालुका प्रमुखांना दिल्याची माहिती खासदार राहुल शेवाळे यांनी दिली.
हेह वाचा - झारखंडमध्ये भाजप पुन्हा सत्तेत येणार नाही हे जवळपास निश्चितच होतं - पृथ्वीराज चव्हाण
शेवाळे म्हणाले, की आता २ लाखांपर्यंत शेतकऱ्यांचे कर्ज माफ झाले आहे. लवकरच शेतकऱ्यांचा सातबाराही कोरा होईल. महाराष्ट्राने नेहमीच नवीन दिशा दिली आहे. राष्ट्रीय पक्ष आणि प्रादेशिक पक्ष एकत्र येवून देशात नवीन दिशा देताना दिसत आहेत. याचाच प्रभाव झारखंडमध्येही दिसत आहे. येणाऱ्या दिवसात संपूर्ण देशभर असा फॉर्म्युला दिसणार असल्याचेही ते म्हणाले. मंत्रिमंडळ विस्ताराबाबत मुख्यमंत्री उद्धव ठाकरे हे निर्णय घेतील. तसेच अनुभवासहित नवीन चेहऱ्यांनादेखील संधी ते नक्की देतील, असा विश्वास शेवाळे यांनी व्यक्त केला.
