मुंबई - वर्ल्ड हिंदू इकॉनॉमिक फोरम (डब्ल्यूएचईएफ)तर्फे बुधवारी 'चाणक्य' या बिझनेस अॅपचे सादरीकरण बॉम्बे स्टॉक एक्सचेंजचे सीईओ व संचालक आशिष चौहान आणि डब्ल्यूएचईएफचे संस्थापक स्वामी विद्यानंद यांच्या उपस्थितीत करण्यात आले. डब्ल्यूएचईएफ या फोरमच्या माध्यमातून जगभरातील हिंदू व्यावसायिक व व्यवसायांना प्रोत्साहन देण्याचे काम केले जाते. यावर्षी डब्ल्यूएचईएफ परिषद २७ ते २९ सप्टेंबर २०१९ या कालावधीत मुंबईत पार पडणार आहे.
डब्ल्यूएचईएफतर्फे वार्षिक परिषदांचेही आयोजन केले जात असते. यात अनेक व्यापारी, उद्योजक, बँकर, ट्रेडर आणि विविध क्षेत्रातील व्यक्ती एकत्र येतात आणि संपत्ती निर्मिती आणि व्यवस्थापनाबद्दलच्या त्यांच्या विचारांची यावेळी देवाणघेवाण होते. या नेटवर्कमध्ये जगभरातील मान्यवर सहभागी होतात. यंदा डब्ल्यूएचईएफचे हे आठवे वर्ष असून चाणक्य या बिझनेस अॅपच्या माध्यमातून त्यांनी आणखी एक पाऊल पुढे टाकले आहे. जगभरातील हिंदू व्यापारांना एकसंध ऑनलाईन नेटवर्किंग व्यासपीठ प्रदान करण्याच्या हेतूने हे अॅप लाँच करण्यात आले आहे. या व्यासपीठाच्या माध्यमातून विविध हिंदू व्यापाऱ्यांना एकमेकांशी संपर्क साधणे सोपे जाणार असून संपत्ती निर्मितीही याद्वारे साधली जाते.
''एकत्रितपणे यशस्वी व व्यावसायिक प्रयत्न केले तरच, भारतातील संभाव्य तंत्रज्ञान, तरुणांची संख्या व अन्य स्त्रोत आपण सक्षमपणे हाताळू शकू.'' असे डब्ल्यूएचईएफचे संस्थापक स्वामी विद्यानंद म्हणाले.
आत्तापर्यंत डब्ल्यूएचईएफ परिषद शिकागो, लॉस एन्जेल्स, बँकॉक, नवी दिल्ली, लंडन आणि हाँगकाँग या ठिकाणी आयोजित करण्यात आल्या असून या परिषदांमध्ये दलाई लामा, तुलसी गब्बार्ड, निर्मला सीतारामण, रोटरियन मा. अन्ना सौबरी, नितीन गडकरी, मोहनदास पै, सुरेश प्रभू आणि प्रा. बिबेक देवरॉय यांनी सहभाग घेतला आहे. यंदा डब्ल्यूएचईएफ परिषद २७ ते २९ सप्टेंबर २०१९ या कालावधीत मुंबईत पार पडणार आहे. परिषदेला उपस्थित राहण्यास इच्छुक असलेल्यांना www.wheforum.org या संकेतस्थळावर नावनोंदणी करावी.
डब्ल्यूएचईएफ समितीचे सदस्य श्रीराज नायर म्हणाले, ''बाराव्या शतकात जगाच्या जीडीपीमध्ये हिंदू जीडीपीचे प्रमाण ३५ टक्के होते. १.३७ अब्ज लोकसंख्या असलेल्या भारताची लोकसंख्या जगाच्या लोकसंख्येच्या १७ टक्के असून जगाच्या जीडीपीमध्ये भारताचा केवळ ३ टक्के सहभाग आहे. भारताची अर्थव्यवस्था मजबूत करणे हे डब्ल्यूएचईएफ ध्येय आहे.''
''डब्ल्यूएचईएफ लोकांना जागरूक करण्‍यासह समाजामध्‍ये संपत्‍तीच्‍या वाढीमध्‍ये भर करणारी साधने आणण्‍यामध्‍ये चांगले काम करत आहे. त्‍यांना तंत्रज्ञानाचे महत्‍त्‍व समजले आहे आणि त्यांनी भारतातील लोकांना मदत करण्‍यासह आपली अर्थव्यवस्था वाढवण्‍यासाठी चाणक्य अॅप सादर केले आहे.'' असे मुंबई शेअर बाजारचे संचालक व मुख्‍य कार्यकारी अधिकारी आशिष चौहान म्हणाले.
