मुंबई - हाजी आली दर्ग्यासमोर एका अज्ञात वाहनाने डेब्रिज टाकले होते. त्यामुळे या विभागातील वाहतूकीवर परिणाम झाला होता. त्यानंतर महापालिका प्रशासनाने पोलिसांच्या मदतीने ७२ तासात त्या डेब्रिज टाकणाऱ्याला ताब्यात घेतले आहे. महापालिका प्रशासनाकडून याबाबतची माहिती देण्यात आली आहे.
मुंबई शहराकडे पश्चिम उपनगरात ये जा करताना हाजी अली दर्ग्यासमोरील रस्त्याचा वापर मोठ्या प्रमाणात केला जातो. या रस्त्यावर लाला लजपत राय मार्गावर ११ जून रोजी एका अज्ञात वाहनामधून डेब्रिज टाकण्यात आला होता. याकारणाने या रस्त्यावरील वाहतुकीवर परिणाम झाला होता. याबाबतची माहिती मिळताच पालिकेच्या दक्षिण विभागाने पोलीस तक्रार दाखल केली होती. त्यानंतर तीन विशेष पथकांद्वारे शोध मोहीम हाती घेण्यात आली होती. या शोध पथकांमध्ये २ महापालिका अधिकाऱ्यांसह ५ कनिष्ठ आवेक्षकांचा (J.O.) समावेश होता. याठिकाणी सीसीटीव्ही नसल्याने या मार्गावर इतर ठिकाणी असलेल्या सीसीटीव्हीच्या आधारे शोध घेण्यात आला.
शोध पथकांनी सलग ७२ तासांपेक्षा अधिक काळ लाला लपजतराय मार्गाच्या अलीकडील व पलीकडील सीसीटीव्हीचे फुटेज तपासून संशयास्पद वाहनांची यादी तयार केली. त्यात एका ठिकाणी सीसीटीव्ही फुटेजमध्ये ट्रकचा क्रमांक 'MH-०१-CR-५७५७' असा असल्याचे निदर्शनास आले. त्यानंतर वाहतूक पोलिसांच्या सहकार्याने ट्रक मालकाची माहिती घेऊन त्याविरोधात पोलीस तक्रार दाखल करण्याची कारवाई तातडीने सुरू करण्यात आली.
या ट्रकद्वारे २४ मे रोजी प्रभादेवी येथे गॅमन हाऊस जवळ डेब्रिज टाकल्याचे सीसीटीव्ही फुटेज निदर्शनास आले. वाहतूक पोलीसांद्वारे उपलब्ध झालेल्या माहितीनुसार, सदर ट्रक श्रीराम जरीबा पवार यांच्या मालकीचा आहे. त्यांच्या विरोधात वाहतूक पोलीस व परिवहन आयुक्तालय यांच्या स्तरावर कडक कारवाई करण्यात येणार आहे. तशी सूचना देण्यात आल्याची माहिती पालिका प्रशासनाकडून देण्यात आली आहे.
