मुंबई - महापालिकेला कर स्वरुपातून मिळणारा महसूल कमी झाला असून महसूल वाढीसाठी महापालिकेने मालमत्ता कर वसुली सुरू केली आहे. यानुसार ३ हजार १७९ मालमत्तांवर जप्तीची कारवाई करण्यात आली आहे. तर २१३ मालमत्ता धारकांचे पाण्याचे कनेक्शन कापण्यात आले आहे, अशी माहिती पालिका प्रशासनाकडून देण्यात आली. दुसरीकडे मालमत्ता कर वसुलीसाठी खासगी संस्थांची मदत घ्यावी, अशी मागणी स्थायी समिती अध्यक्ष यशवंत जाधव यांनी केली आहे.
मुंबई महापालिका क्षेत्रात सुमारे ४ लाख ५० हजार मालमत्ता धारक असून यामध्ये १ लाख २७ हजारांपेक्षा अधिक निवासी, ६७ हजारांपेक्षा अधिक व्यवसायिक, औद्योगिक स्वरुपाच्या ६ हजारांपेक्षा अधिक, १२ हजार १५६ भूभाग आणि इतर प्रकारच्या मालमत्तांचा समावेश आहे. त्यापैकी ३ हजार ३९२ मालमत्तांवर कारवाई करण्यात आली आहे. यामध्ये सुमारे १ हजार ३७६ कोटींचा मालमत्ता कर थकित असणा-या ३ हजार १७९ मालमत्तांवर जप्तीची कारवाई करण्यात आली आहे. तर २६९ कोटींपेक्षा अधिकची थकबाकी असणा-या २१३ मालमत्ता धारकांचे पाणी कनेक्शन तोडण्यात आले आहे.
मालमत्ता कराची थकबाकी भरण्यास टाळाटाळ करणा-या मे. सुमेर बिल्डरच्या 'रे रोड' भागातील एका कार्यालयातून लॅपटॉप, संगणक, प्रिंटर, टेबल, खुर्च्या, सोफा इत्यादी जप्त करण्यासह सदर ठिकाणचा 'आरएमसी' प्लांट 'सिल' करण्यात आला आहे.
एप्रिल २०१९ - २०२० या आर्थिक वर्षासाठी ५ हजार ४०० इतका कर वसूल करण्याचे लक्ष पालिकेने ठेवले होते. यापैकी गेल्या आठवड्यापर्यंत ३ हजार १५४ कोटी एवढी रक्कम वसूल झाली होती. गेल्या आठवड्याभरातच ३५० कोटी रुपयांचा भरणा थकबाकीदारांनी महापालिकेकडे केला आहे. मात्र, असे असले तरीही अनेक थकबाकीदारांकडून अद्याप येणे असल्याचे प्रशासनाकडून सांगण्यात आले.
मुंबई महापालिकेचे अधिकारी योग्य प्रकारे काम करत नाहीत. त्यामुळे मालमत्ता कराची वसुली होत नाही. यासाठी पालिकेने 'क्लीन अप मार्शल'च्या धर्तीवर खासगी संस्थांची नेमणूक करून मालमत्ता कर वसूल करावा, अशी मागणी स्थायी समिती अध्यक्ष यशवंत यांनी केली आहे.
