मुंबई - महाराष्ट्र नवनिर्माण सेनचे अध्यक्ष राज ठाकरे यांना ईडीने नोटीस पाठवली आहे. त्यांना २२ ऑगस्ट रोजी चौकशीसाठी उपस्थित राहण्याचे आदेश दिले आहेत. मात्र, यामुळे राज्यातील व मुंबई शहर उपनगरातील मनसे कार्यकर्ते नाराज झाले आहेत. त्यामुळे मनसेच्या कार्यकर्त्यांकडून कुठलाही अनुचित प्रकार घडून नये यासाठी बेस्ट प्रशासनाने आज काही बसेसला लोखंडी जाळी लावून रस्त्यावर उतरवले आहे.
उद्या सकाळी राज ठाकरे ईडी कार्यालयात पोहचतील. त्या दरम्यान काही उत्साही कार्यकर्त्यांकडून शहर व उपनगरात अनुचित प्रकार घडवण्याची शक्यता वर्तविण्यात आली आहे. त्यामुळे आज प्रशासनाकडून खबरदारी म्हणून मनसेच्या कार्यकर्त्यांना १४९ अंतर्गत नोटीस पाठवण्यात आल्या आहेत. तर काही कार्यकर्त्यांची धरपकड करण्याची तयारी देखील पोलिसांनी सुरु केली आहे. नियमांचे उल्लंघन केले तर कारवाई केली जाईल, असे देखील पोलिसांनी या नोटीसमध्ये सांगितले आहे.
यावेळी शहर प्रशासनाप्रमाणेच बेस्ट प्रशासनाने देखील खबरदारीचा उपाय म्हणून उपनगरातील काही बसेसला लोखंडी जाळ्या लावून रस्त्यावर उतरविले आहे. घाटकोपर पूर्व बेस्ट थांब्यावरून चेंबूर, मानखुर्द, गोवंडी, शिवाजीनगर, माहुलकडे जाणाऱ्या बसेसला लोखंडी जाळ्या बसविल्याचे दिसून आले आहे.
