Sachin Tendulkar on Janata Raja Mahanatya : शिवाजी महाराज की जय असे म्हटल्याशिवाय राहवत नाही-सचिन तेंडुलकर

छत्रपती शिवरायांच्या जीवनावरील जाणता राजा हे महानाट्य डोळ्याचे पारणे फेडणारे आहे. या महानाट्याची अनुभूती घेतल्यानंतर छत्रपती शिवाजी महाराज की जय असे म्हटल्याशिवाय राहवत नाही, अशी प्रतिक्रिया भारतरत्न सचिन तेंडुलकर यांनी व्यक्त केली. जाणता राजा महानाट्य पाहण्यासाठी आवर्जून उपस्थिती लावत सचिनने शिवरायांना अभिवादन केले.

मुंबई : छत्रपती शिवरायांच्या जन्मावर आधारित जाणता राजा हे महानाट्य म्हणजे मराठी रसिकांना पर्वणी आहे. सुगी ग्रुप यांच्या संकल्पनेतून रंगमंचावर अवतरलेल्या या महानाट्यास आमदार आशिश शेलार यांनी पाठबळ दिल्याने रसिकांना आनंद लुटता येत आहे. 14 मार्च पासून 19 मार्च पर्यंत दादर येथील छत्रपती शिवाजी महाराज पार्कवर सुरू असलेल्या या सोहळ्याला दररोज हजारो प्रेक्षक गर्दी करत आहेत.

छत्रपती शिवाजी पार्कपासून माझी सुरुवात : तेंडुलकरशनिवारी या महानाट्याला भारतरत्न सचिन तेंडुलकर यांनी आवर्जून उपस्थिती लावली. यावेळी बोलताना सचिन तेंडुलकर म्हणाले की, माझी शाळेतील इतिहासाची सुरुवात ही छत्रपती शिवरायांच्या इतिहासापासून झाली. शिवरायांचा जाज्वल्य इतिहास आपल्या सर्वांना माहित आहेच. तर, माझ्या खेळाची सुरुवात या शिवाजी पार्क मैदानापासून झाली. छत्रपती शिवरायांच्या संपूर्ण जीवनावरील हे महानाट्य पाहण्याची संधी मला मिळाली आहे. ही अनुभूती अत्यंत स्फूर्तीदायक आहे. त्यामुळे छत्रपती शिवराय यांना वंदन केल्याशिवाय, छत्रपती शिवाजी महाराज की जय म्हटल्याशिवाय राहत नाही, असे उद्गार त्यांनी यावेळी काढले.