मुंबई- राज्यावर कोरोना संकट उभे असताना पोलीस बांधव स्वतःच्या जिवाची पर्वा न करता दिवस रात्र रस्त्यावर उभे राहून नागरिकांना नियम पाळा व हे संकट आपल्यापासून दूर करण्याचे आवाहन करीत आहेत.प्रसिद्ध पोर्टेट कलाकार चेतन राऊत यांनी महाराष्ट्र पोलिसाचे 4860 पुश पिनच्या सहा रंगाच्या छटाच्या साहाय्याने चित्र रेखाटून त्यांच्या कार्याचे आभार मानले.
देशात कोरोना रुग्णाची संख्या वेगात वाढत असताना याचे सर्वाधिक रुग्ण महाराष्ट्रात आढळत आहेत. यातच राज्यातील रुग्ण पैकी 60 टक्के रुग्ण एकट्या मुंबईत आढळून आल्याने सर्वच यंत्रणेवर ताण पडतो आहे. विषाणूचा प्रसार रोखण्यासाठी राज्यातील लॉकडॉऊन कालावधी 30 एप्रिल पर्यंत मुख्यमंत्री उद्धव ठाकरे यांनी वाढवण्याची घोषणा केली आहे. पवई येथील रहिवासी असलेले आणि जेजे स्कुल ऑफ आर्टचे विद्यार्थी असलेले चेतन राऊत यांनी अनोख्या पद्धतीने कलेतून महाराष्ट्र पोलिसाना मानवंदना दिली आहे. चेतनने घरातच पुश पिनच्या सहाय्याने मुंबई पोलिसांच्या एका हवालदाराचे सुंदर असे पोट्रेट तयार केले आहे.
पोलिसांचे आभार आपल्या कलाकृतीतून मांडण्यासाठी चेतन राऊत यांनी सहा रंगाच्या ४८६० पुश पिन वापरून ३० इंच x १८ इंच असे हे पोलिसाचे चित्र साकारले आहे.या अगोदर चेतन राऊत यांनी राज्याचे मुख्यमंत्री उद्धव ठाकरे प्रसिद्ध उद्योगपती रतन टाटा व कोरोना संकटात लढा देणारे डॉक्टरांचे चित्र रेखाटून लक्ष वेधले होते. आता महाराष्ट्र पोलीस कर्मचाऱ्याचे चित्र रेखाटत पोलिसांच्या कार्याला राऊत यांनी सलाम केलेला आहे.
लोकांनी घराबाहेर पडू नये,घरात असलेल्या लोकांना काही गरज असेल तर मदत व्हावी, यासाठी पोलस दिवसातील कित्येक तास काम करत आहेत. काम करताना त्यांना कोरोनाचा संसर्ग देखील होवू शकते, तरी देखील आपले कर्तव्य पार पाडत आहेत. देशावर आलेल्या संकटाना तोंड देताना कुठे काही पोलीस हातावरच पोट असणाऱ्या गोर गरीबांना जेवण देत आहेत तर काही कर्मचारी मुख्यमंत्री कोरोना सहाय्यता निधीला योगदान देत आहेत.
