मुंबई - गेल्या वर्षी कोरोनाच्या उद्रेकामुळे मनोरंजनसृष्टीवर आघात कोसळला होता आणि अजूनही परिस्थिती काही चांगली नाही. या काळात अनेक कलाकार तंत्रज्ञांचा कोरोनामुळे बळी गेला. परंतु, कोरोना काळातच, चित्रपटसृष्टीतील एका तंत्रज्ञाने आत्महत्या केली असून त्याचा कोरोना महामारीशी तसा काही संबंध नाही. सुप्रसिद्ध कला दिग्दर्शक राजू सापते यांनी पुण्यातील आपल्या राहत्या घरी आत्महत्या केली. यापूर्वी आर्थिक विवंचनेतून काही आत्महत्येची प्रकरणं समोर आली असली, तरी सापते यांनी वेगळ्याच कारणासाठी स्वतःचा जीव घेतला. खरंतर एका वेगळ्या रीतीच्या ‘महामारी’मुळे त्यांचा हकनाक बळी गेला. आत्महत्या करण्यापूर्वी राजू सापते यांनी एक व्हिडीओ शूट करून प्रसिद्ध केला आणि त्यांच्या हत्येला कोण कारणीभूत आहे हे नमूद केले.
आत्महत्येपूर्वी व्हिडीओ केला शेयर -
या व्हिडीओ मध्ये त्यांनी सांगितले की, चित्रपटसृष्टीतील एका लेबर युनियनचा पदाधिकारी राकेश मौर्या हा त्यांना नाहक त्रास देत आहे आणि बदनामी करत कामगारांचे पैसे बुडविल्याचा आरोप करीत आहे. जो तद्दन खोटा आहे. या व्हिडीओमध्ये राजू सापते म्हणाले की, ‘नमस्कार, मी राजेश मारुती सापते. मी एक आर्ट डिरेक्टर आहे. हे शूट करीत असताना मी कोणतीही नशा केलेली नाही आणि पूर्णपणे शुद्धीत आहे. पूर्ण विचाराअंती मी आता हा निर्णय घेत आहे. कारण मला काही गोष्टींचा खूप त्रास होत आहे. त्यातली ही गोष्ट आहे की, राकेश मौर्या जे लेबर युनियनचे पदाधिकारी आहेत, ते मला उगाचच खूप त्रास देत आहेत. माझं कुठच्याही प्रकारचे पेमेंट तिथे थकीत नाही. सगळी पेमेंट्स नियमितपणे केलेली आहेत. माझ्याबद्दल लेबर युनियनमध्ये एकही तक्रार नाही. तरीही राकेश मौर्या हा व्यक्ती युनियनमधील काही कामगारांना मुद्दाम फोन करून, त्यांच्याकडून ते वदवून घेत आहेत की राजू सापतेने पैसे दिलेले नाहीत.’
राजू सापते यांनी पुढे म्हटलेय की, 'मी नरेश मेस्त्री नामक व्यक्तीला फोन करून विचारले असता त्याने सांगितले की मी त्याचे कसलेही पेमेंट थकविलेले नाही. तरीही राकेश मौर्या हे मला खूप सतावत आहे आणि माझ्या कामात बाधा घालत आहे. सध्या माझ्याकडे ५ प्रोजेक्ट आहेत, ज्याचे काम मला तत्काळ सुरु करायचे आहे. राकेश मौर्याच्या त्रासामुळे मला 'झी'चे एक मोठा प्रोजेक्ट सोडून द्यावा लागला, तसेच दशमी क्रिएशनचे काम सुरु असताना त्याच्यामुळे ते मध्येच थांबवले गेले. या गोष्टीचा निषेध म्हणून मी आज आत्महत्या करत आहे. मला न्याय देण्याचा प्रयत्न करावा.’
मनसेकडून घटनेची दखल -
कला दिग्दर्शक राजू सापते यांच्या आत्महत्येनंतर महाराष्ट्र नवनिर्माण चित्रपट सेनेचे अध्यक्ष अमेय खोपकर यांनी संताप व्यक्त केला आहे. अमेय खोपकर यांनी ठणकावून सांगितले आहे की, 'उच्च न्यायालयाच्या आदेशानुसार कोणत्याही संघटनेच्या पदाधिकाऱ्याला, भलेही तो राजकीय पक्षाचा सदस्य असेल तरी, चित्रपट किंवा मालिकेच्या सेटवर जाऊन चित्रीकरण बंद पाडता येऊ शकत नाही. जर का कोणी असा प्रयत्न केला, तर तुम्ही ताबडतोब महाराष्ट्र नवनिर्माण सेनेशी संपर्क साधावा आणि आम्ही तुमचे बंद पडलेले शूटिंग लगेचच सुरु करून देऊ. यापुढे कोणताही निर्माता, दिग्दर्शक आणि कलाकारांना युनियनच्या लोकांनी सेटवर जाऊन त्रास दिला, तर हातपाय तोडल्याशिवाय राहणार नाही. ही धमकीच आहे.'
पुढे बोलताना अमेय खोपकर म्हणाले, 'राकेश मौर्या हा लेबर युनियनचा खजिनदार आहे. या क्षेत्रात गेल्या अनेक वर्षांपासून त्याची दादागिरी चालते आणि आम्ही त्याला याआधी बडविले सुद्धा आहे. त्याच्यापाठी कोणाचे राजकीय पाठबळ आहे, याविषयी मला बोलायचे नाही. मात्र, भविष्यात कोणताही निर्माता किंवा दिग्दर्शकाला संघटनेच्या पदाधिकाऱ्यांकडून त्रास होत असेल, तर महाराष्ट्र नवनिर्माण सेनेशी संपर्क साधावा. या बाहेरून आलेल्या लोकांनी आमच्या लोकांना कुठल्याही प्रकारचा, शारीरिक अथवा मानसिक, त्रास दिला तर आम्ही हे सहन करणार नाही. मी गृहमंत्री आणि मुख्यमंत्री यांना पत्र लिहिणार आहे की या राकेश मौर्या ला मनुष्यवधाच्या खुनाच्या गुन्याखाली अटक करा.'
हेही वाचा - Aamir Kiran Divorce : १५ वर्षांचे सहजीवन संपले, आमिर खान आणि किरण राव यांचा घटस्फोट
