मुंबई - कोरानामुळे लॉकडाऊन काळात मुंबई तसेच विविध शहरात अडकलेल्या मजुरांसाठी अनेक मदतीचे हात पुढे आलेले आपल्याला पाहायला मिळाले. महाराष्ट्र राज्यात अनेक राज्यातील कामगार अडकलेले होते. त्यांना घरी सोडण्यासाठी स्पेशल श्रमिक ट्रेनने त्यांची व्यवस्था करण्यात आली. मुंबईत अनेक देवदूत कोरोना संकटात मदत करताना दिसले. त्यामध्ये सर्वच आपत्कालीन व्यवस्थेतील कर्मचारी आहेत. पण मुंबई पोलीस आणि काही सामाजिक संस्था यांच्या मदतीचे कौतुक करावे तितके कमी आहे. असाच एक प्रसंग सोमवारी मुंबई सेंट्रल स्थानकात पाहायला मिळाला. पश्चिम बंगालला परतणाऱ्या स्थलांतरित मजुरांनी मुंबई पोलिसांचे कौतुक करताना स्थानकातच मुंबई पोलीस जिंदाबाद.. जिंदाबाद.. अशा घोषणा दिल्या. हा व्हिडिओ समाज माध्यमावर मोठ्या प्रमाणात व्हायरल झाला असून सर्वत्र पोलिसांचे कौतुक होत आहे.
मुंबई पोलिसांच्या कौतुकाचा व्हिडिओ सध्या समाज माध्यमावर मोठ्या प्रमाणात व्हायरल होत आहे. मुंबई पोलिसांचे तसेच महाराष्ट्रातील पोलिसांनी या कोरोना संकटात मोठ्या प्रमाणात योगदान दिले आहे. त्यांची सेवा ही कौतुकास्पद आहे. त्यामुळे श्रमिक ट्रेनमधून मुंबई पोलिसांचे कौतुक होताना मुंबई पोलीस भारावून गेले. पुन्हा एकदा असेच काम करण्याची ऊर्जा आम्हला मिळाली, असे पोलिसांनी यानंतर सांगितले.
