मुंबई - विक्रोळी रेल्वे स्थानकांवर लोकल येत असल्याचे पाहून रेल्वे रूळावर उडी घेत एका महिलेने आत्महत्या केल्याची धक्कादायक माहिती समोर आली आहेत. संजना अजित शेरे (वय 27 वर्षे) मृत महिलेचे नाव आहे.
सीसीटीव्ही कॅमेऱ्यात कैद झाली घटना
मिळालेल्या माहितीनुसार, शनिवारी (दि. 8 मे) सकाळी 10.35 च्या सुमारास विक्रोळी रेल्वे स्थानकाच्या फलाट क्रमांक 4 वर संजना बराच वेळ बसून होती. काही वेळानंतर भरधाव वेगाने लोकल येत असल्याचे बघताच या तिने रेल्वे रुळावर उडी मारली आणि आपले डोके रेल्वे रुळावर ठेवून झोपली. अवघ्या काही सेकंदात जलद लोकल तिच्या अंगावरून गेली आणि यात तिचा जागीच मृत्यू झाला. हा सर्व प्रकार रेल्वे स्थानकावर लागलेल्या सीसीटीव्ही कॅमेऱ्यात कैद झाला आहे. या घटनेची माहिती कुर्ला लोहमार्ग पोलिसांना मिळताच त्यांनी घटनास्थळी धाव घेतली. या महिलेचा मृतदेह शवविच्छेदनासाठी नेण्यात आला आहे. कुर्ला लोहमार्ग पोलीस या घटनेची चौकशी करत आहेत.
पतीबरोबर झाले होते भांडण
पोलिसांनी दिलेल्या माहितीनुसार, संजना शेरेचे 7 मे रोजी तिच्या पती बरोबर भांडण झालेले होते. या भांडणानंतर ती रागारागात घराच्या बाहेर पडली होती. घरच्यांना मी कामावर जात असल्याचे तिने सांगितले होते. संजना ही विक्रोळी स्थानकांवर येऊन बसली. बराच वेळ विक्रोळी स्थानकांवर बसल्यानंतर तिने आत्महत्या करण्याचा निर्णय घेतला आणि याची माहिती तिने आपल्या कुटुंबियांना मोबाईलच्या मेसेजद्वारे दिली होती. कुर्ला लोहमार्ग पोलिसांनी भा.दं.वि.च्या कलम 306, 498 आणि 34 अन्वये गुन्हा नोंदवून चौकशी करत आहे.
हेही वाचा - चेंबूर परिसरात नशेसाठी अवैध औषधांची विक्री करणाऱ्यांचा दोघांना अटक
