मुंबई - आयआयटी मुंबईच्या एअरोस्पेस विभागाच्या प्रयोगशाळेत शुक्रवारी दुपारी हायड्रोजन फुग्याचास्फोट झाला. यात एका कर्मचाऱ्यासह २ प्रशिक्षणार्थी जखमी झाले. या घटनेमध्ये भाजलेल्या मेकॅनिकल विभागाचे कर्मचारी आणि२ प्रशिक्षणार्थींना उपचारासाठी नवी मुंबईतील एरोली येथील नॅशनल बर्न सेंटर या रुग्णाल्यात दाखल करण्यात आले आहे. यातील दोघांना अतिदक्षता विभागात ठेवण्यात आले आहे.
आयआयटी मुंबईतील मेकॅनिकल विभागाचे अर्धवेळ कर्मचारी तुषार जाधव हे २ प्रक्षिणार्थ्यांसह एका प्रोजेक्टवर काम करत होते. तुषार जाधव यांनी प्रशिक्षणार्थी प्रशांत सिंग आणि रजत कुमार यांना फुग्यामध्ये हायड्रोजन भरण्यास सांगितले होते. दुपारी साडेबाराच्या सुमारास फुग्यामध्ये हायड्रोजन भरताना अचानक फुग्यांचा स्फोट झाला. या घटनेमध्ये जाधव आणि दोन्ही प्रशिक्षणार्थी भाजले. त्यांना तात्काळ आयआयटीच्या रुग्णालयात दाखल करण्यात आले. त्यानंतर पुढिल उपचारासाठी नवी मुंबईतील एरोली भागात असलेल्या नॅशनल बनर्स सेंटर येथे नेण्यात आले. त्या तिघांवर उपचार चालू असून, त्यांना गंभीर धोका नसल्याचे आयआयटी मुंबईच्यावतीने प्रवक्त्याने स्पष्ट केले आहे.
या घटनेत भाजलेले ते २ प्रशिक्षणार्थी आणि कर्मचारी यावेळी आयआयटी मुंबईचे नसल्याचे प्रशासनाच्यावतीने जाहिर करण्यात आले. तुषार जाधव यांनी आपले शिक्षण आयआयटीमधून घेतले असून, ते आता आयआयटी मुंबईच्या मॅकानिकल विभागात अर्धवेळ कर्मचारी आहेत.
