मुंबई - विधानपरिषदेच्या 9 रिक्त जागांसाठी होत असलेल्या निवडणुकीसाठी उमेदवारी अर्ज भरण्याचा आज शेवटचा दिवस आहे. विधान परिषद निवडणूक बिनविरोध होणार हे आता स्पष्ट झाले आहे. काँग्रेसने दुसरा उमेदवार मागे घेतल्यामुळे ही निवडणूक बिनविरोध होत आहे. आज महाविकासआघाडीच्या नेत्यांकडून अर्ज दाखल केले गेले, तर भाजपकडून चार उमेदवारांसह आज आणखी दोन उमेदवारांचे डमी अर्जही दाखल केले आहेत.
विधान परिषद निवडणुकीसाठी अर्ज दाखल करण्यासाठी आज शेवटचा दिवस आहे. भाजपकडून याआधी चार उमेदवारांनी अर्ज भरले, तर आज भाजपकडून आणखी दोन उमेदवार अर्ज दाखल केला आहे. भाजपचे नेते संदीप लेले आणि रमेश कराड यांनी आज अर्ज दाखल केले. विधान परिषद विरोधी पक्ष नेते प्रविण दरेकर हे सुद्धा यावेळी उपस्थित होते. उमेदवारी अर्जात कोणती चूक झाली अथवा काही अडचणीमुळे अर्ज बाद झाला, तर त्यासाठी खबरदारी म्हणून हे दोन डमी उमेदवार असल्याची माहिती देण्यात आली आहे.
विधानपरिषदेसाठी भाजपने डॉ. अजित गोपचडे, प्रवीण दटके, गोपीचंद पडळकर आणि रणजितसिंह मोहिते यांना उमेदवारी दिली, तर काही अडचण झाल्यास भाजप नेते रमेश कराड, संदीप लेले यांचे अर्ज आज भरण्यात आले आहेत. यावेळी विरोधी पक्षनेते प्रवीण दरेकर यांच्यासह भाजप आमदार उपस्थित होते.
डमी अर्ज दाखल केलेले रमेश कराड कोण आहेत? -
रमेश कराड यांनी यापूर्वी देखील विधानपरिषदेच्या निवडणुकीत बंडखोरी केली होती. त्यांना राष्ट्रवादीची उमेदवारी जाहीर झाली होती. मात्र, पंकजा मुंडे यांनी आश्चर्यकाररित्या रमेश कराड यांना पुन्हा भाजपमध्ये आणले आणि राष्ट्रवादीवर मात केली. त्यानंतर २०१९ ला कराड यांनी लातूर ग्रामीणमधून विधानसभेसाठी तयारी केली होती. मात्र, तो मतदारसंघ शिवसेनेला गेला. त्यामुळे त्यांची निराशा झाली होती. आता त्यांनी भाजपकडून डमी अर्ज दाखल केला आहे.
