लातूर - अवकाळी पावसामुळे राज्यात अनेक ठिकाणी पिकांचे मोठ्या प्रमाणात नुकसाना झाले आहे. त्या पार्श्वभूमीवर शिवसेना पक्षप्रमुख उद्धव ठाकरे यांनी मराठवाड्यातील पिकांच्या नुकसानीचा पीक पाहणी दौरा केला. या सबंध दौऱ्यात त्यांनी मुख्यमंत्री पदावरून कोणतेही भाष्य केले नाही. मात्र, नुकसान झालेल्या पिकांची पहाणी करून परतत असताना शिवसैनिकांनी त्यांच्यासमोरच मुख्यमंत्री कुणाचा... शिवसेनेचा! अशा घोषणा दिल्या. त्यामुळे स्थानिक कार्यकर्त्यांमध्येही मुख्यमंत्री शिवसेनेचा पाहिजे अशी भावना झाल्याचे चित्र यावेळी पाहायला मिळाले.
13 दिवसांपासून युतीमध्ये मुख्यमंत्री कुणाचा यावरून रणकंदन सुरू आहे. असे असतानाही शिवसेना पक्षप्रमुख उद्धव ठाकरे यांनी दोनवेळा मराठवाड्यातील नुकसान झालेल्या पिकांची पाहणी केली आहे. यादरम्यान कोणतेही राजकीय भाष्य करण्याचे उद्धव ठाकरे यांनी टाळले. या संबंधी कार्यकर्त्यांना सूचना देण्यात आल्या होत्या. मात्र, अहमदपूर तालुक्यातील सांगवी सुनेगाव येथील पिकांची पाहणी करून उद्धव ठाकरे परतत असताना कार्यकर्त्यांनी मुख्यमंत्री पदाला घेऊन घोषणाबाजी सुरू केली. मुख्यमंत्री कुणाचा....शिवसेनेचा आशा घोषणा कार्यकर्ते देत असतानाही याबाबत कोणतेही वक्तव्य न करता उद्धव ठाकरे यांनी काढता पाय घेतला. त्यामुळे अद्यापही पक्षश्रेष्ठी आणि कार्यकर्ते मुख्यमंत्री पदावरून ठाम असल्याचे पाहवयास मिळाले.
