लातूर - निलंगा शहरातील आनंदमुनी चौकात दोघांमध्ये वाद झाला. या वादावादीत शिवा बिडवे यांनी ज्ञानेश्वर शिंदे यांच्यावर चाकूहल्ला केल्याची घटना घडली असून यात शिंदे जखमी झाले आहेत. शनिवारी दुपारी २ च्या सुमारास ही घटना घडली. शिंदे यांना सध्या उपचारासाठी लातूर शासकीय रुग्णालयात दाखल करण्यात आले आहे.
शहरातील आनंदमुनी चौकात ज्ञानेश्वर शिंदे थांबले असता दारूच्या नशेत असलेले शिवा बिडवे त्याठिकाणी आले. काही कारणावरून दोघांमध्ये बाचाबाची सुरू झाली. पुढे याचेच रुपांतर हाणामारीमध्ये झाले. दरम्यान, शिवा बिडवे यांनी ज्ञानेश्वर शिंदे यांच्यावर चाकूहल्ला करून त्या ठिकाणाहून पळ काढला.
जखमी ज्ञानेश्वर शिंदे यांना उपचारासाठी निलंगा उपजिल्हा रुग्णालयात उपचार करण्यात आले. यानंतर पुढील उपचारासाठी लातूर येथील शासकीय रुग्णालयात त्यांना पाठविण्यात आले आहे. याबाबत तात्काळ निलंगा पोलिसांनी शिवा बिडवे यांना अटक केली असून पुढील तपास निलंगा पोलीस करत आहेत.
