लातुरात वातावरणातील बदलाने साथीच्या रोगांचा प्रादुर्भाव; रुग्णांच्या संख्येत वाढ

पाऊस नसतानाही जिल्हावासीयांचे आरोग्य बिघडले असून गेल्या आठ दिवसांपासून रुग्णांच्या संख्येत वाढ झाली आहे. त्यामुळे रुग्णांची वाढती संख्या रोखण्यासाठी प्रतिबंधात्मक उपाययोजनांची अंमलबजावणी गरजेची आहे.

लातूर - जिल्ह्यात पाऊस नसला तरी ढगाळ वातावरण आणि साचलेल्या दूषित पाण्यामुळे साथीच्या आजारांमध्ये वाढ झाली आहे. ताप, सर्दी, खोकला याशिवाय दूषित पाण्यामुळे गॅस्ट्रो यासारखे साथीचे आजार वाढले आहेत. लातूर शासकीय रुग्णालयाची ओपीडी आठशेवरून थेट बाराशेवर गेली आहे. त्यामुळे 24 तास रुग्णांची सेवा आणि प्रतिबंधात्मक उपाययोजना म्हणून स्वाईन फ्लूचा कक्षही उभारण्यात आला आहे.

जिल्ह्यातील रुग्णांच्या सेवेसाठी एक जिल्हा शासकीय रुग्णालय आणि 10 ग्रामीण रुग्णालये आहेत. साथीच्या आजारांच्या रुग्णांची संख्या वाढत असल्याने येथील शासकीय रुग्णालयात दिवसाकाठी सातशे ते आठशे रुग्ण तपासणीसाठी येतात. मात्र, गेल्या आठ दिवसांपासून रुग्णांच्या संख्येत वाढ झाली असून हा आकडा बाराशेवर येऊन ठेपला आहे.

साथीच्या आजाराबाबत आरोग्य विभागाकडून 47 पथके तयार करण्यात आली आहेत. संसर्गजन्य आजारांवर नियंत्रण ठेवणे आणि अत्यावश्यक आरोग्य सेवा पुरविणे हा उद्देश समोर ठेवण्यात आला होता. मात्र, स्थानिक पातळीवर याची अंमलबजावणी झाली नसल्याने साथीच्या आजारात वाढ झाली आहे. ही पथके ऑक्टोबर महिन्यापर्यंत कायम राहणार आहेत. आजारांचे प्रमाण कमी करण्यासाठी ग्रामीण भागात आठवड्यातून एकदा कोरडा दिवस, पावसाच्या पाण्याचे नमुने, पाणी गळतीची तपासणी करणे आवश्यक आहे.

जिल्ह्यातील शासकीय रुग्णालयांची संख्या -
01 शासकीय वैद्यकीय महाविद्यालय व सर्वोउपचार रुग्णालय
10 ग्रामीण रुग्णालये
46 प्राथमिक आरोग्य केंद्र
01 स्त्री रुग्णालय
10 तालुका आरोग्य अधिकारी