संतापजनक.. कोरोनामुळे रुग्णालयात दाखल करून न घेतल्याने दोन गर्भवतींची रस्त्यावरच प्रसूती

गर्भवती महिला कोरोना पॉझिटिव्ह की निगेटीव्हच्या नादात गडहिंग्लज आणि आजरा येथील रुग्णालयांनी दाखल करुन घेण्यास नकार दिला. यामुळे एका गर्भवती महिलेची प्रसूती रुग्णालयाबाहेरील रस्त्यावरच झाली. या प्रकारामुळे नागरिकांनी संतप्त प्रतिक्रिया व्यक्त केल्या आहेत.

कोल्हापूर/ नाशिक - राज्यात कोरोनामुळे आरोग्यसेवा कोलमडून पडली असताना राज्याची मान शरमेने खाली घालणाऱ्या दोन घटना समोर आल्या आहेत. कोरोना रिपोर्ट पॉझिटिव्ह की निगेटिव्हच्या या वादात गर्भवतीला रुग्णालयात दाखल करून न घेतल्याने महिलेची रुग्णालयासमोरील रस्त्यावरच प्रसूती झाल्याची धक्कादायक घटना कोल्हापूर जिल्ह्यातील आजरा येथे घडली आहे. दुसऱ्या घटनेत नाशिक महानगरपालिकेच्या रुग्णालयात दाखल करून न घेतल्याने एका महिलेची प्रसूती गुरुवारी (3 सप्टेंबर) रस्त्यावरच झाली होती. त्यानतंर त्या महिलेचा स्वॅब घेण्यात आला होता. त्याचा अहवाल पॉझिटिव्ह आला असून त्या महिलेला व तिच्या बाळाला तातडीने जिल्हा रुग्णालयातील कोरोना कक्षात दाखल करण्यात आले आहे.

कोरोना चाचणी दिलेल्या गर्भवती महिलेला रुग्णालयात दाखल करून न घेतल्याने महिलेची रुग्णालयासमोरील रस्त्यावरच प्रसूती झाली. कोल्हापूर जिल्ह्यातील आजरा तालुक्यामध्ये हा धक्कादायक प्रकार घडला आहे. संबधित महिलेला दाखल करून घेण्यासाठी रुग्णालयांनी नकार दिल्याने महिलेची आजरा येथील एका रुग्णालयाच्या दारातच प्रसूती झाली आहे.

गडहिंग्लज तालुक्यातील अनेक रुग्णालयांनी सुद्धा महिलेला दाखल करून घेण्यास नकार दिला होता. त्यामुळे पुन्हा आजरा तालुक्यातील रुग्णालयात मध्ये गेले असता तिथेही दाखल करून घेण्यास नकार देण्यात आला. कोरोनाच्या पार्श्वभूमीवर हा संपूर्ण प्रकार घडला असून महिला पॉझिटिव्ह की निगेटिव्ह या वादा दरम्यान महिलेची रुग्णालयाच्या दारातच प्रसूती झाली. त्यामुळे आरोग्य व्यवस्थेचा प्रश्न किती गंभीर बनला आहे हे समोर आले आहे.

हेही वाचा-शिक्षकदिनी शिक्षकांची पायपीट, विविध मागण्यांसाठी कोल्हापूर व्हाया सांगली ते बारामती 'वारी'

संबंधित महिलेचे गडहिंग्लज तालुक्यात सासर आहे तर आजरा तालुक्यात तिचे माहेर आहे. त्यामुळे दोन्ही तालुक्यातील रुग्णालयात दाखल करून घेतले नसल्याने महिलेची शेवटी रुग्णालयाच्या दारातच प्रसूती झाली आहे. या धक्कादायक घटनेनंतर स्थानिक नागरिकांनी तीव्र प्रतिक्रिया व्यक्त केल्या आहेत. प्रशासनाने अशा प्रकारच्या घटनेवेळी तरी रुग्णालयांनी तात्काळ रुग्णांना दाखल करून घेण्याची गरज नागरिकांनी व्यक्त केल्या आहेत.

दरम्यान, अशाच प्रकारची एक घटना नाशिकमध्ये आज समोर आली आहे. प्रसूतीकळा असह्य झालेली महिला नाशिक महानगरपालिकेच्या मोरवाडी रुग्णालयात आली होती. मात्र, रुग्णालयातील डॉक्टरांनी त्या महिलेला घरी परत पाठवले. यानंतर घरी निघालेल्या महिलेला वाटेतच प्रसूती कळा असह्य झाल्याने नगरसेविका डोमसे आणि इतर महिलांनी गर्भवती महिलेची प्रसूती भर रस्त्यात केली. महापालिका रुग्णालयाच्या अनास्थेमुळे महिलेला अशा बिकट प्रसंगाला सामोरे जावे लागले.