कोल्हापूर- साडेतीन शक्तीपीठांपैकी एक पीठ असलेल्या करवीर निवासिनी अंबाबाईच्या मंदिरामध्ये पगारी पुजारी नेमण्याची प्रक्रिया सुरू झाली आहे. गुरुवारपासून कोल्हापूरमधील टेंबलाई मंदिरामध्ये 'पश्चिम महाराष्ट्र देवस्थान समिती' कडून पात्र उमेदवारांच्या मुलाखती घेण्यात येत आहेत.
गुरुवार सकाळपासून या मुलाखतींना सुरुवात झाली असून तब्बल ८१ उमेदवार मुलाखतीसाठी पात्र ठरले आहेत. यामध्ये देवीची पूजा कशा पद्धतीने बांधली जावी, मूर्तीला साडी कशी नेसवावी याबाबत सखोल माहिती आणि प्रश्न या मुलाखतीमध्ये विचारले जात आहेत.
पश्चिम महाराष्ट्र देवस्थान समितीचे सदस्य या मुलाखती घेत असून इतर देवस्थान मधील ज्येष्ठ पुजाऱ्यांनाही बोलवण्यात आले आहे. विशेष म्हणजे ८१ उमेदवारांमध्ये तब्बल १५ महिला उमेदवार आहेत. मुलाखतींना सुरुवात झाल्याने आता मंदिरात पगारी पुजारी लवकरच नेमले जाण्याची शक्यता आहे. अंबाबाई मंदिरात देवीला घागरा चोळी नेसवल्यावर कोल्हापूरमध्ये पुजारी हटाव वाद निर्माण झाला होता. यानंतर राज्य सरकारने अधिसूचना काढून देवस्थान समितीला पगारी पुजारी नेमण्याचे हक्क दिले आहेत. त्यानुसार या मुलाखती घेतल्या जात आहेत. गुरूवारपासून 3 दिवस या मुलाखती होणार आहेत.
