कोल्हापूर - चळवळीतल्या लोकांच्या नादाला लागू नका, पंचनामा करायला लागलो तर अंगावर कपडे असूनही तुम्ही नागडे झाल्याशिवाय राहणार नाही. त्यामुळे जास्त अंगावर आला तर तुमच्या अंगलट येईल, अशी जोरदार टीका स्वाभिमानीचे खासदार राजू शेट्टी यांनी महसूलमंत्री चंद्रकांत पाटील यांच्यावर केली. शरद पवारांच्या उपस्थितीत कोल्हापुरात महाघाडीचा मेळावा पार पडला यावेळी ते बोलत होते.
गेल्या काही दिवसांपासून राजू शेट्टी आणि महसूलमंत्री चंद्रकांत पाटील यांच्यात टीका- प्रति टीकांच्या फैरी झडू लागल्या आहेत. राजू शेट्टींनी मोदी लाटेत निवडून येऊन आपले घर भरले. शिवाय कारखादारांकडून पैसे घेऊन शेट्टींनी सेटलमेंट केली असल्याचा आरोपसुद्धा महसूलमंत्री चंद्रकांत पाटील यांनी केला होता. त्याला प्रत्युत्तर देताना शेट्टी यांनी चंद्रकांत पाटील यांचा चांगलाच समाचार घेतला.
महसुलमंत्र्यांनी कधीही बिंदू चौकात यावे आणि मी कोणत्या कारखानदाराकडून पैसे घेऊन सेटलमेंट केली हे पुराव्यासहित सांगावे. माझ्यावर आरोप करण्याआधी तुम्ही काय केलं ते सांगा. सांगली कोल्हापूर रस्त्यांच्या २० कोटींचा हिशोब दादांनी द्यावा. हे पैसे कुठे आणि किती खर्च झाले सांगावे. कंपन्यांची मांडवली करून सगळे रस्ते खाजगीकरणातून केले, मग तुम्ही काय विकास केलात असा सवालही त्यांनी चंद्रकांत पाटील यांना केला.
