कोल्हापूर : मुख्यमंत्री कोण? ठाकरे की अजित पवार, मुख्यमंत्र्यांनी खुलासा करावा

सध्या वाढीव वीज बिल प्रश्न गाजत आहे. कृषीपंपासाठी शेतकऱ्यांना 50 टक्के वीज बिलात सवलत देता येईल, असा प्रस्ताव महावितरणने मुख्यमंत्री उद्धव ठाकरे यांच्याकडे पाठवला आहे. महावितरणने इतका स्पष्ट प्रस्ताव पाठवला असतानाही मुख्यमंत्री ठाकरे यांनी त्यावर निर्णय घेतलेला नाही. त्यामुळे महाराष्ट्रात मुख्यमंत्री कोण आहे? असा प्रश्न पडतो, असा टोला प्रकाश आंबेडकर यांनी लगावला.

कोल्हापूर - महावितरणने शेतकर्‍यांना वीज बिलात 50 टक्के सवलत देता येईल, असा प्रस्ताव मुख्यमंत्री उद्धव ठाकरे यांना दिला आहे. परंतु त्यावर ते निर्णय घेत नसल्याने महाराष्ट्राचे मुख्यमंत्री कोण आहेत? उद्धव ठाकरे की अजित पवार, असा सवाल जनतेला पडला आहे. त्यामुळे याचा खुलासा खुद्द मुख्यमंत्री उद्धव ठाकरे यांनीच करावा, अशी मागणी वंचित बहुजन आघाडीचे नेते अ‌ॅड. प्रकाश आंबेडकर यांनी कोल्हापुरात पत्रकार परिषदेत केली आहे.

वंचित बहुजन आघाडीचे पदवीधर मतदारसंघातील उमेदवार प्रा. सोमनाथ साळुंखे व शिक्षक मतदारसंघातील उमेदवार सम्राट शिंदे यांच्या प्रचारार्थ प्रकाश आंबेडकर मंगळवारी कोल्हापूर दौऱ्यावर आले होते. कार्यकर्त्यांच्या मेळाव्यानंतर कोल्हापुरात त्यांनी पत्रकारांशी संवाद साधला.

मुख्यमंत्री कोण याचा खुलासा करावा -

प्रकाश आंबेडकर म्हणाले की, सध्या वाढीव वीज बिल प्रश्न गाजत आहे. कृषीपंपासाठी शेतकऱ्यांना 50 टक्के वीज बिलात सवलत देता येईल, असा प्रस्ताव महावितरणने मुख्यमंत्री उद्धव ठाकरे यांच्याकडे पाठवला आहे. त्यामुळे महावितरण वर किती कोटीचा बोजा पडणार आहे आणि तो सहन करण्याची क्षमता महावितरणमध्ये असल्याचा उल्लेख प्रस्तावात केला आहे. महावितरण इतका स्पष्ट प्रस्ताव पाठवला असतानाही मुख्यमंत्री ठाकरे यांनी त्यावर निर्णय घेतलेला नाही. त्यामुळे महाराष्ट्रात मुख्यमंत्री कोण आहे? असा प्रश्न पडतो. घरगुती वीज बिलात सवलत दिल्यास अडीच हजार कोटींचा बोजा पडेल असे सांगितले जाते. ही रक्कम ज्यादा नसल्याने घरगुती वीज बिलात सवलत द्यावी. भाजपच्या काळात थकबाकी वाढली हे देखील खरे असल्याचेही आंबेडकर म्हणाले.

मराठा समाजाच्या आरक्षणाला आमचा पाठिंबा -
मराठा आरक्षणाबाबत बोलताना अ‌ॅड. आंबेडकर म्हणाले, मराठा समाजाला 16 टक्के आरक्षण दिले होते. परंतु त्याला सर्वोच्च न्यायालयाने स्थगिती दिली. शासनाने मराठा समाजातील विद्यार्थ्यांना सवलत देण्याचा निर्णय घेतला. तसा आदेशही काढला. त्याला आमचा पाठिंबा आहे. अनेक आंदोलनानंतर मराठा समाजाला आरक्षण मिळाले आहे. संभाजी ब्रिगेड, जिजाऊ ब्रिगेड संघटनेने शासनाने जो निर्णय घेतला आहे त्याची अंमलबजावणी करून घ्यावी, असेदेखील आंबेडकर म्हणाले.

हेही वाचा -इंदापुरात भाजपच्यावतीने वीज बिलाची होळी करून आंदोलन

हेही वाचा -वाढीव वीज बिलांबाबत राज्यात संभ्रमावस्था कायम, जनतेत असंतोष