मराठा आक्रमक..! पुणे-मुंबईला जाणारे दूध रोखण्याचा प्रयत्न, आंदोलक ताब्यात

मराठा आरक्षणाला स्थगिती दिल्यानंतर मराठा समाज आक्रमक झाला आहे. आरक्षणावरील स्थगिती उठविण्याच्या मागणीसाठी राज्यभरात ठीकठिकाणी आंदोलने करण्यात येत आहेत. आज कोल्हापुरात मराठा संघटनांनी आंदोलनाचा भाग म्हणून मुंबई पुण्याला जाणारे दुधाचे टँकर अडवण्याचा प्रयत्न केला. त्यावेळी पोलिसांनी हस्तत्रेप करून आंदोलकांना ताब्यात घेतले आहे.

कोल्हापूर - मराठा आरक्षणाला सर्वोच्च न्यायालयाने स्थगिती दिल्यानंतर राज्यातील मराठा समाज आक्रमक झाला आहे. आज सकल मराठा समाजाकडून कोल्हापूरातून मुंबई-पुण्याला जाणारे दूध पुरवठा रोखण्याचा प्रयत्न झाला. यावेळी आंदोलनकर्त्यांनी थेट गोकुळ शिरगावमधील गोकुळ दूध संघाच्या दारातच ठिय्या मारला. मात्र, मराठा आंदोलकांच्या या पवित्र्याला विरोध करताना पोलीस आणि आंदोलकांमध्ये यावेळी मोठी झटापट झाली. दरम्यान, मराठा समाजाचे आंदोलन दडपण्याचा प्रयत्न झाल्यास, महाराष्ट्रभर याचा उद्रेक होईल, असा इशारा सकल मराठा समाजाने दिला आहे. मात्र पोलिसांनी यावेळी आंदोलकांच्या इशाऱ्याला न जुमानता कार्यकर्त्यांना ताब्यात घेतले.

मराठा आरक्षणाला स्थगिती मिळाल्याने राज्यात टप्याटप्याने आंदोलनाला सुरुवात झाली आहे. आज पश्चिम महाराष्ट्रातून पुणे-मुंबईला जाणारे दूध रोखणार असल्याचा इशारा सकल मराठा समाजाने दिला होता. त्यानुसार सकाळी साडेदहाच्या सुमारास आंदोलन कर्त्यांनी थेट गोकुळ शिरगाव येथील गोकुळ दूध संघावर आपला मोर्चा वळवला. आंदोलनाची तीव्रता लक्षात घेता पोलिसांचा मोठा बंदोबस्त तैनात करण्यात आला होता. यावेळी 'एक मराठा लाख मराठा'च्या घोषणा देत आंदोलन कर्त्यांनी गोकुळ दूध संघावर चाल केली. यावेळी त्यांना संघाच्या गेटवरच अडवण्यात आले. त्यामुळे आंदोलन कर्त्यांनी गेटवरच ठिय्या मारत, राज्य सरकारचा निषेध केला.

आरक्षणाचा निर्णय घेण्यास अपयशी ठरलेल्या राज्यसरकाराचा येत्या मंगळवारी श्राद्ध घालणार असल्याचे, आंदोलन कर्त्यांनी सांगितले. तसेच राज्यसरकारने जम्बो पोलीस भरती जाहीर केली आहे. मात्र, मराठा आरक्षणाचा प्रश्न मार्गी लागल्याशिवाय भरती न करता जाहीर केलेली मेघाभरती थांबवावी, अशी मागणीही मराठा संघटनांनी केली. यावेळी पोलिसांनी आंदोलनकर्त्यांना आंदोलन मागे घेण्याची विनंती केली. मात्र आंदोलकांनी आपला आक्रमक पवित्रा कायम ठेवला. तसेच आंदोलन दडपण्याचा प्रयत्न झाल्यास, याचे पडसाद राज्यभर उमटतील, असा इशाराही पोलिसांना दिला. यावेळी मात्र पोलिसांनी कठोर भूमिका घेत आंदोलकांना ताब्यात घेतले. यावेळी पोलीस व आंदोलन कर्त्यामध्ये मोठी झटापट झाली.