कोल्हापूर - कोरोनामुळे गेली 2 वर्षे बंद असलेला कुंकुमार्चन सोहळा आज अनेक दिवसानंतर संपन्न झाला. ( Kunkumarchan Program Kolhapur Ambabai ) या सोहळ्याला तब्बल 5 हजारांहून अधिक महिलांनी सहभाग नोंदवला. करवीर निवासिनी श्री अंबाबाई मंदिराबाहेर ( Shri Ambabai Temple Kolhapur ) असलेल्या भवानी मंडप परिसरात हा सोहळा पार पडला. यावेळी संपूर्ण परिसरात महिला मोठ्या संख्येने यामध्ये सहभागी झाल्याने भक्तिमय वातावरण निर्माण झाले होते. करवीर निवासिनी श्री अंबाबाईची मूर्ती त्याच्या मूळ जागी स्थापन होऊन 300 वर्षे पूर्ण झाली आहेत. यामुळे श्री महालक्ष्मी अन्नछत्र ट्रस्ट च्या वतीने हा सोहळा आयोजित करण्यात आला होता. तर यंदाचे हे सहावे वर्ष आहे.
• पाच हजारपेक्षा जास्त महिला सहभागी -
कोल्हापुरातील श्री महालक्ष्मी अन्नछत्र सेवा ट्रस्ट, कोल्हापूर यांच्यावतीने आयोजित केलेला सौभाग्य व सौख्यदायी श्री कुंकुमार्चन सोहळा आज रविवार श्रीअंबाबाई मंदिरातील पूर्व दरवाजा ते भवानी मंडप परिसरात संपन्न झाला. या सामुदायिक उपासनेत ५००० पेक्षा जास्त महिला सहभागी झाल्या. यामध्ये मुंबई, पुणे, सातारा, सांगली कोकणभाग व सीमा भागातूनही अनेक महिला पहाटे पासूनच मंदिर परिसरात उपस्थित होत्या. गेल्या ६ वर्षांपासून अंबाबाई मंदिरात हा सोहळा पार पडला जातो. मात्र, गेली 2 वर्षे कोरोना संसर्गमुळे हा सोहळा होऊ शकला नव्हता. यामुळे यावर्षी मोठ्या संख्येने महिलांनी सहभाग घेतला. तसेच यावेळी ५००० महिलांमधून लकी ड्रॉच्या माध्यमातून ५ भाग्यवान सुहासिनींना सोन्याची नथ, ५ भाग्यवान सुहासिनींना फेशीयल किट, २१ सुहासिनिंना पैठणी बक्षीस म्हणून देण्यात आले.
हेही वाचा - Dared to ride a bullock cart : 16वर्षाच्या दीक्षाची कमाल; उसळणाऱ्या बैलाला क्षणात थोपवले
• का केला जातो कुंकुमार्चन सोहळा -
करवीर निवासिनी श्री महालक्ष्मी (अंबाबाई) देवीच्या मूर्तीच्या मूळ जागी पुर्नप्रतिष्ठापना होऊन ३०७ वर्षे पूर्ण झाली आहेत. या निमित्ताने हा सोहळा पार पडला. आपल्या संस्कृतीत मकर संक्रांतीनंतर हळदीकुंकु करण्याची परंपरा आहे. या परंपरेप्रमाणे स्त्रियांनी एकत्र येण्याचा सामाजिक हेतू आहे. हा सोहळा आयोजित करत नात्यांचा बंध जपण्याचा व एकोप्याचे वाण देण्याचा मानस असतो. यामुळे कुंकुमार्चन सोहळ्याचे आयोजन करण्यात येत असते. यावेळी विधीतील सहभागी सर्व महिलांना अंबाबाईच्या पादुका, कुंकू व द्रोण देण्यात आले होते. त्यांनी द्रोणमध्ये पादुका ठेवून त्यावर सलग १००० वेळा अंबाबाईचा नामजप करत कुंकूमार्चन करत असतात. मंदिर प्रशासनाच्या आवाहनानुसार या धार्मिक विधीसाठी सर्व महिला हिरव्या रंगाच्या साड्या नेसून आल्या होत्या. या धार्मिक विधीत कोल्हापुरसह आजूबाजूच्या विविध भागातील सुवासिनी महिला सहभागी झाल्या होत्या.
