पदवीधर आणि शिक्षक निवडणुकीची कोल्हापूरची तयारी पूर्ण; निवडणूक प्रशासन सज्ज

राज्यात सध्या शिक्षक आणि पदवीधर मतदारसंघाच्या निवडणुकीची रणधुमाळी सुरू आहे. १ डिसेंबरला त्यासाठी मतदान होणार आहे. त्यापार्श्वभूमीवर कोल्हापूर जिल्हा प्रशासन निवडणुकीसाठी सज्ज असल्याची माहिती जिल्हाधिकारी देसाई यांनी दिली.

कोल्हापूर - येत्या 1 डिसेंबरला शिक्षक आणि पदवीधर मतदारसंघासाठी सकाळी 8 ते सायंकाळी 5 या वेळेमध्ये मतदान होणार आहे. या मतदानाची जिल्हा प्रशासनाने संपूर्ण तयारी केली आहे. या निवडणुकीसाठी प्रशासन सज्ज असल्याची माहिती कोल्हापूरचे जिल्हाधिकारी दौलत देसाई यांनी दिली. या मतदानासाठी जवळपास 2000 हून अधिक कर्मचारी अधिकाऱ्यांना प्रशिक्षण देण्यात आल्याचेही त्यांनी म्हंटले आहे.

व्हीसीद्वारे जिल्ह्यातील आढावा -

निवडणुकीच्या पार्श्वभूमीवर जिल्हाधिकारी दौलत देसाई यांनी व्हिडिओ कॉन्फरन्सिंगच्या माध्यमातून जिल्ह्यातील सर्व उपविभागीय अधिकारी, तहसीलदार यांच्याशी संवाद साधला. शिवाय तेथील तयारीबाबत त्यांनी आढावा घेत मतदान सुरळीत पार पडावे याबाबत कोणत्या उपाययोजना केल्या आहेत याची माहिती घेतली.

जिल्ह्यात शिक्षक आणि पदवीधर मिळून 281 मतदान केंद्र आहेत. त्यामध्ये पदवीधरसाठी 205 आणि शिक्षकसाठी 76 असा समावेश आहे. पदवीधर मतदान केंद्रासाठी मतदान केंद्राध्यक्ष, मतदान अधिकारी क्रमांक 1, मतदान अधिकारी क्रमांक 2, मतदान अधिकारी क्रमांक 3 आणि शिपाई, असे एकूण 1025 जणांची नियुक्ती करण्यात आली आहे. यासाठी 315 राखीव ठेवण्यात आले आहेत, असे एकूण 1340 नियुक्त अधिकारी व कर्मचारी यांचे प्रशिक्षण दोन दिवसांपूर्वी तालुकास्तरावर पार पडले आहे. शिक्षक मतदान केंद्रासाठी 380 अधिकारी कर्मचाऱ्यांची नियुक्ती असून 120 राखीव ठेवण्यात आले आहेत, अशा एकूण 500 अधिकारी, कर्मचाऱ्यांचे प्रशिक्षण झाले. त्याचबरोबर 281 मायक्रो ऑब्झरवर, 85 राखीव अशा एकूण 366 जणांचेही प्रशिक्षण दोन दिवसांपूर्वी पार पडले आहे. कोरोनाच्या पार्श्वभूमीवर खबरदारीचा सूचना - कोरोनाचा प्रादुर्भाव अद्याप थांबला नाहीये. त्यामुळे याची खबरदारी घेत जिल्हा प्रशासनाने सर्वच मतदान केंद्रामध्ये योग्य ती खबरदारी घेण्याच्या सूचना देण्यात आल्या आहेत. मास्क, सॅनिटाझरचा वापर तर आवश्यक आहेच त्याचबरोबर प्रत्येकाचे थर्मल स्कॅनिंग करून आत मध्ये सोडावे अशा सूचना सुद्धा देण्यात आल्या आहेत.