कोल्हापूर : गेल्या काही महिन्यांपासून पेट्रोल आणि डिझेलचे दर सतत वाढत आहेत. आज पेट्रोल दर लिटरला शंभर रुपयाच्याही पुढे गेले आहे. त्यामुळे पंतप्रधान नरेंद्र मोदी हे शतकवीर ठरले आहेत. त्यांनी मारलेली पेट्रोल दराची ही सेंचुरी गोरगरिबांचे कंबरडे मोडणारी आहे, असा घणाघात ग्रामविकास मंत्री हसन मुश्रीफ यांनी केला. कोल्हापूरमधील कागल येथे पेट्रोल दरवाढी विरोधात राष्ट्रवादी काँग्रेस पक्षाच्यावतीने निदर्शने करण्यात आली. यावेळी ते बोलत होते.
मोदींकडून शेतकऱ्यांची थट्टा
हाडे गोठवणार्‍या थंडीतही शेतकरी दिल्लीमध्ये गेल्या ७० ते ७५ दिवसांपासून आंदोलन करत आहेत. या आंदोलनादरम्यान २०० पेक्षा जास्त शेतकऱ्यांचा मृत्यू झाला आहे. मात्र, पंतप्रधानांना शेतकऱ्यांशी संवाद साधायला वेळ नाहीये. उलट आंदोलनजीवी म्हणत मोदींनी शेतकऱ्यांची थट्टा केली असल्याची टीका मुश्रीफ यांनी केली.
