कोल्हापूर - कोरोना काळात कोल्हापूर जिल्हा परिषदेने केलेल्या साहित्य खरेदीत 35 कोटींचा घोटाळा झाल्याचा आरोप भाजपने केला आहे. मास्क, सॅनिटायझर तसेच अन्य आवश्यक साहित्य चढ्या दराने खरेदी करून यंत्रणेतील लोकांनी मोठा डल्ला मारल्याचे भाजप सदस्यांचे म्हणणे आहे. सत्ताधारी महाविकास आघाडीने मात्र विरोधकांच्या या सर्व आरोपांचे खंडन केले. साहित्य खरेदीवरून सुरू असलेल्या आरोप-प्रत्यारोपामुळे कोल्हापूर जिल्हा परिषदेतील वातावरण चांगलेच तापले आहे.
कोरोनाचा संसर्ग वेगाने वाढतोय. जिल्ह्यातील रुग्णसंख्येन आता 16 हजारांचा टप्पा ओलांडला असून कोरोना बळींची संख्या देखील 500 पर्यंत जाऊन पोहचली आहे. एका बाजूला जिल्ह्यात अशी गंभीर स्थिती असताना जिल्हा परिषदेने कोरोना काळात केलेली साहित्य खरेदी चर्चेचा विषय बनली आहे. साहित्य खरेदीत 30 ते 35 कोटींचा भ्रष्टाचार झाल्याचा गंभीर आरोप जिल्हा परिषदेतील विरोधी भाजपच्या सदस्यांनी केला आहे. साहित्य खरेदी करणाऱ्या यंत्रणेतील लोकांनी काही ठराविक लोकांना हाताशी धरून हा ढपला पाडल्याचे भाजप सदस्यांचे म्हणणे आहे. विरोधकांचा हा आरोप काल झालेल्या सर्वसाधारण सभेवेळी कळीचा मुद्दा बनला. विरोधकांना सभागृहात यायला मज्जाव केल्याने भाजप आणि मित्र पक्षाच्या सदस्यांनी अध्यक्षांच्या दालनाबाहेरच ठिया मारत निषेध व्यक्त केला. कोरोना काळात मास्क, सॅनिटायझर, पीपीई किट, पल्स ऑक्सीमिटर, व्हेंटिलेटर असे सगळे साहित्य चढ्या दराने खरेदी केल्याचा आरोप करत याची 'कॅग'मार्फत चौकशी करण्याची मागणी भाजपचे सदस्य राजवर्धन नाईक निंबाळकर यांनी केली आहे.
हेही वाचा - कोल्हापुरातील 'या' तरुण आमदाराला कोरोनाची लागण
जिल्हा परिषदेतील सत्ताधारी महाविकास आघाडीने भाजप आणि मित्र पक्षांनी केलेल्या या आरोपांचे खंडन केले. कोणतीही खरेदी बेकायदेशीर किंवा चढ्या दराने केली नसल्याचा दावा पदाधिकाऱ्यांकडून केला जात आहे. विरोधकांकडून होणारे आरोप सिद्ध झाल्यास पदांचा राजीनामा देण्याची तयारीही प्रमुख पदाधिकाऱ्यांनी दर्शवली आहे.
सत्ताधाऱ्यांनी या आरोपाचे खंडन केले असले तरी, माहिती अधिकार कार्यकर्ते दिलीप देसाई यांनी देखील मास्क खरेदीत मोठी तफावत असल्याचे सांगितले आहे. यात घोटाळा झाला असून त्याची चौकशी कॅगमार्फत करावी, अशी मागणी त्यांनी केली आहे.
कोल्हापूर जिल्ह्यात मार्च ते मेपर्यंत कोरोनाचा प्रादुर्भाव कमी होता, मग या काळात मोठ्या प्रमाणात साहित्य खरेदी का केली? कोट्यवधीची साहित्य खरेदी असतानाही रुग्णांना बेड मिळत नसल्याने मरावे का लागतंय? खरेदी केलेले साहित्य नेमके कोणाच्या खिशात गेले? असे अनेक प्रश्न भाजपने उपस्थित करत पालकमंत्री सतेज पाटील आणि ग्रामविकास मंत्री हसन मुश्रीफ यांनाच अप्रत्यक्षपणे घोटाळ्याचे सूत्रधार म्हणून लक्ष्य केले. यावर दोन्ही मंत्र्याची भूमिका आता काय असणार? हे पाहणे महत्त्वाचे ठरणार आहे.
हेही वाचा - ईटीव्ही भारत विशेष : कोल्हापुरात गाईच्या शेणापासून बनविल्या पर्यावरणपूरक गणेशमूर्ती
