जालना - एका 60 वर्षीय महिलेचा 'सारी' या आजाराने मृत्यू झाल्याची अफवा सर्वत्र पसरली. त्यामुळे जालना जिल्ह्यामध्ये काही काळ घबराटीचे वातावरण निर्माण झाले होते. मात्र, या महिलेचा मृत्यू 'सारी' ने झाला नसल्याचा निर्वाळा जिल्हा शल्य चिकित्सक डॉ. मधुकर राठोड यांनी दिला आहे. मंठा तालुक्यातील एक महिला सर्दी, ताप, या आजारामुळे 8 एप्रिलला जालना शहरातील एका खासगी रुग्णालयात भरती झाली होती. त्यानंतर तिचा काल (14 एप्रिल) मृत्यू झाला होता.
जालना शहरामध्ये महिलेला भरती करून प्राथमिक तपासणी केल्यानंतर न्यूमोनियाचे लक्षणे दिसली. त्यामुळे या रुग्णालयातून या महिलेला शासकीय रुग्णालयात पाठविले. इथे भरती झाल्यानंतर रुग्णालयाने या महिलेचे स्वॅब घेऊन प्रयोगशाळेत पाठविले होते. तो अहवाल देखील निगेटिव्ह आला. त्यानंतर दोन दिवस इथे उपचार घेतल्यानंतर परत या महिलेच्या नातेवाईकांनी जालना शहरातील एका खासगी रुग्णालयात पुढील उपचारासाठी नेले होते. मात्र, या रुग्णालयात भरती होण्यापूर्वीच त्या डॉक्टरांनी महिलेसाठी लागणाऱ्या सुविधा या शासकीय रुग्णालयात आहेत, त्यामुळे त्या महिलेला पुन्हा सरकारी दवाखान्यात पाठविले.
दरम्यानच्या काळात या महिलेला डायलिसिसची आवश्यकता असल्याचे लक्षात आल्यानंतर नातेवाईकांनी पुढील उपचारासाठी औरंगाबाद येथील महात्मा गांधी मिशन हॉस्पिटलशी संपर्क साधला. त्यानंतर काल (14 एप्रिल) सकाळी अकरा वाजेच्या सुमारास खासगी रुग्णवाहिका करून औरंगाबाद येथे घेऊन गेले. दरम्यान, या हॉस्पिटलमध्ये डॉक्टरांनी महिलेची तपासणी करून मृत घोषित केले. आणि ही रुग्णवाहिका तशीच महिलेच्या मूळ गावी रवाना झाली.
दरम्यान, आज दिनांक 15 एप्रिल रोजी दुपारपासूनच जालना शहर आणि जिल्ह्यामध्ये महिलेचा 'सारी' आजारामुळे मृत्यू झाल्याची अफवा सर्वत्र पसरली आणि नागरिकांमध्ये घबराट सुरू झाली. मात्र, या महिलेला न्यूमोनिया तसेच किडनी आणि दम्याचा त्रासासोबतच इतरही आजार होते. त्यामुळे या महिलेचा मृत्यू झाला असल्याचा निर्वाळा जिल्हा शल्य चिकित्सक डॉ. मधुकर राठोड यांनी दिला आहे.
