जालना - परतूर पोलिसांनी महाराष्ट्रात बंदी असलेला गुटखा (गोवा) पकडला. या गुटख्याची किंमत १५ लाख ६० हजार रुपये आहे. याबाबत अन्न सुरक्षा अधिकारी निखील सूर्यकांत कुलकर्णी यांनी परतूर पोलीस ठाण्यात तक्रार दिली आहे.
पोलीस उपनिरीक्षक विजय जाधव मंगळवारी सकाळी आष्टी-परतूर रस्त्यावर गस्त घालत असताना आयशर या वाहनात संशयास्पद माल असल्याचे आढळले. जाधव यांनी ट्रक थांबवून चालकाला आणि सहकाऱ्याला विचारणा केली. त्यांनी यामध्ये गुटखा असल्याचे सांगितले. याप्रकरणी रसूल रुकमोडी इनामदार (वय-35, रा. केसार जळगाव) आणि त्याचा सहकारी जगन्‍नाथ शिवाजी गायकवाड (वय-24, चिंचोली भुयार) या दोघांविरुद्ध प्रतिबंधित गुटखा बाळगल्याप्रकरणी गुन्हा दाखल करण्यात आला आहे .
हेही वाचा - पुण्यातील प्रसिद्ध येवले चहाला एफडीएचा दणका
पकडण्यात आलेल्या आयशरमध्ये एकूण 250 पोती (7 हजार 800 पाकीटे) सापडली. याप्रकरणी पोलिसांनी दोन्ही आरोपींना ताब्यात घेऊन पुढील चौकशी सुरू केली आहे.
