जालना - अल्पवयीन मुलीला फूस लावून पळवून नेल्याची घटना परतूर येथे घडली. या प्रकरणी मुलीच्या आईने पोलीस ठाण्यात तक्रार दिली. मुलीला पळवून नेणाऱ्या आरोपीचे नावही पोलिसांना सांगण्यात आले. तरीही पोलिसांनी आरोपीला पकडण्यात टाळाटाळ केली. त्यामुळे मुलीच्या नातेवाईकांनी पोलीस अधीक्षक कार्यालयात जाऊन आपली तक्रार दिली.
16 जानेवारीला बाहेरची कामे करून घरी आल्यानंतर मुलीच्या आईला पंधरा वर्षाची मोठी मुलगी दिसली नाही. तेव्हा तिचा शोध घेत असताना गल्लीतील मुलगा नसीर उर्फ नसीम काजी हा त्या मुलीला जबरदस्तीने ओढून तिचा विनयभंग करताना दिसून आला. त्यावेळी त्याला पकडून मुलीच्या समाजातील लोकांनी मारहाण केली. त्यावेळी त्याने जातीवाचक शिवीगाळ करुन धमकी दिली.
हेही वाचा - बाल लैंगिक अत्याचार प्रकरणातील दोषींना पाकिस्तान सार्वजनिकरित्या फाशी देणार
त्यानंतर प्रतिष्ठेमुळे मुलीच्या घरच्यांनी याबाबत काही कार्यवाही केली नाही. मात्र, तेव्हापासून आरोपी वारंवार घरासमोर येऊन मुलीला खुणावत असे. 31 जानेवारीच्या मध्यरात्री दोनच्या सुमारास मुलगी शौचासाठी बाहेर गेली. बराच वेळ होऊनही ती परत न आल्यामुळे मुलीच्या कुटुंबियांनी बाहेर जाऊन पाहिले. तेव्हा नसीर उर्फ नसीम काजी हा मोटरसायकलवरून तिला पळवून नेताना दिसला. मुलीसोबत शारीरिक संबंध ठेवण्यासाठी मुलीला पळवून नेल्याची तक्रार मुलीच्या आईने परतूर पोलीस ठाण्यात दाखल केली. पोलिसांनी कलम 354, 363, 366 अन्वये गुन्हा नोंद केला आहे. दरम्यान, आरोपीचे नाव देऊनही पोलिसांनी काहीच दखल न घेतल्यामुळे मुलीच्या समाजाच्यावतीने पोलीस अधीक्षकांना निवेदन देण्यात आले.
