जालना - राज्याचे पशुसंवर्धन व दुग्धविकास राज्यमंत्री तथा जालन्याचे आमदार अर्जुन खोतकर यांनी आगामी विधानसभेसाठी शिवसेनेच्या वतीने उमेदवारी अर्ज दाखल केला आहे. उमेदवारी अर्ज भरण्यापूर्वी खोतकरांचे त्यांच्या घरी औक्षण करण्यात आले.
दुपारी खोतकरांच्या दर्शना या बंगल्यावर पत्नी आणि परिवारातील महिलांच्या हाताने औक्षण करून ते तहसील कार्यालयाकडे रवाना झाले. यावेळी त्यांच्या समवेत केंद्रीय राज्यमंत्री खासदार रावसाहेब दानवे, आमदार नारायण कुचे, आमदार संतोष दानवे, जिल्हा परिषद अध्यक्ष अनिरुद्ध खोतकर, शिवसेनेचे जिल्हाप्रमुख भास्कर अंबेकर, उद्योजक किशोर अग्रवाल, घनश्याम शेठ गोयल व कार्यकर्ते उपस्थित होते.
हेही वाचा... भाजपची १२५ जणांची पहिली यादी जाहीर; 'यांना' मिळाली उमेदवारी
अर्ज भरल्यानंतर प्रसारमाध्यमांशी बोलताना खोतकर म्हणाले की, सातव्यांदा उमेदवारी अर्ज भरताना आपल्याला आनंद होत आहे. तसेच आपल्यातील आणि कार्यकर्ते यांचा उत्साह आजही कायम आहे, त्यामुळे शिवसेनेचा विजय निश्चितच आहे. खासदार दानवे यांनीदेखील खोतकर यांना पन्नास हजार मताधिक्‍याने निवडून आणण्याचे आश्वासन दिले आहे.
हेही वाचा... अरुण गवळीची मुलगी विधानसभा लढवणार; भायखळ्यातून मैदानात
