जालना - रुग्णांना घेऊन जाणारी रुग्णवाहिका व दुचाकीत झालेल्या अपघातात दुचाकीवरील व्यक्ती जागीच ठार झाला. तर पत्नी गंभीर जखमी झाली आहे. ही घटना भोकरदन जालना मुख्य रस्त्यावरील सोयगाव देवी पाटीजवळ घडली आहे. सतीश सिताराम मोकळे (30, रा.दहेगाव) असे या अपघातातील मृताचे नाव आहे.
प्राप्त माहितीनुसार दहेगाव येथील सतीश मोकळे व सीमा मोकळे हे दांपत्य जालना येथे उपचार घेत असलेल्या एका नातेवाईकाच्या भेटीसाठी गेले होते. रात्री ते दुचाकीने घरी परतत असतांना भोकरदन जालना मुख्य रस्त्यावरील सोयगाव देवी पाटीजवळ समोरून रुग्णवाहिका आली. या दोन्ही वाहनात सामोरा समोर जोरदार धडक झाली. या धडकेत दुचाकीवरील दाम्पत्य गंभीर जखमी झाले. यातील सतीश यांच्या डोक्याला अधिक मार लागल्याने त्यांचा जागीच मृत्यू झाला. तर त्यांची पत्नी सीमा यांना नागरिकांनी जखमी अवस्थेत भोकरदन ग्रामीण रुग्णालयात दाखल केले आहे. प्राथमिक उपचार करून पुढील उपचारासाठी औरंगाबाद येथील घाटी रुग्णालयात हलविण्यात आल्याचे माहिती वैद्यकीय अधिकाऱ्यांनी दिली आहे.
