जळगाव - उस्मानाबादेत आयोजित करण्यात आलेले 93 वे अखिल भारतीय मराठी साहित्य संमेलन हे मराठी साहित्य विश्वाच्या इतिहासातील आजवरचे वेगळे आणि ऐतिहासिक असे साहित्य संमेलन असणार आहे. संमेलनाला लाभलेले अध्यक्ष तसेच बोलीभाषेला मिळालेले हक्काचे व्यासपीठ, ही या साहित्य संमेलनाची प्रमुख वैशिष्ट्ये सांगता येतील. बोलीभाषेसाठी आयुष्य वेचणाऱ्या साहित्यिकांना या संमेलनात मानाचे स्थान मिळणार आहे. बोलीभाषेच्या संवर्धनासाठी उचललेलं पाऊल स्वागतार्ह असल्याचे मत ज्येष्ठ अहिराणी साहित्यिक कृष्णा पाटील यांनी व्यक्त केले आहे.
हेही वाचा - साहित्याची जत्रा: महाराष्ट्र साहित्य परिषदेचे कार्याध्यक्ष प्राध्यापक मिलिंद जोशी यांच्याशी खास बातचीत
अहिराणी बोलीभाषेच्या भरीव कार्यासंदर्भात दिल्लीतील प्रतिष्ठित साहित्य अकादमीच्या वतीने 2000 ला 'भाषासन्मान' पुरस्काराने गौरविण्यात आलेले ज्येष्ठ अहिराणी साहित्यिक कृष्णा पाटील यांच्याशी 'ईटीव्ही भारत'ने संवाद साधला. यावेळी पाटील यांनी दिलखुलास मते मांडली. ते म्हणाले, आजवर पार पडलेल्या साहित्य संमेलनांमध्ये बोलीभाषांना हवं तसं स्थान मिळत नव्हते. मात्र, मराठी भाषेच्या अस्तित्त्वाचा आज प्रश्न निर्माण झाला आहे. मराठीला वाचविण्यासाठी बोलीभाषांचा उजागर करणे आवश्यक आहे. हेच ओळखून संमेलनाच्या आयोजकांनी बोलीभाषांना चांगले व्यासपीठ उपलब्ध करून देण्याचा निर्णय घेतलेला दिसतो. मराठी वाचविण्यासाठी जरी हा निर्णय घेतला असला तरी बोलीभाषेचा एक समर्थक म्हणून मला तो स्वागतार्ह वाटतो. या संमेलनात 'पोत' नावाची स्मरणिका प्रकाशित होणार आहे. या स्मरणिकेसाठी विविध लेखकांकडून बोलीभाषांचे लेख, कविता मागाविण्यात आले आहेत. ही चांगली बाब आहे. या निमित्ताने बोलीभाषेसाठी झटणाऱ्या साहित्यिकांना एक व्यासपीठ उपलब्ध होईल, असे पाटील म्हणाले.
बोलीभाषा आणि प्रमाणभाषा दोघांचा अवलंब करावा -
कोणताही माणूस जन्म घेतल्यानंतर आधी बोलीभाषेचा स्वीकार करतो. एकप्रकारे तो बोलीभाषेच्या संवर्धन प्रक्रियेतील एक घटक असतो. त्यानंतर तो प्रमाणभाषा शिकतो. मात्र, कोणत्याही नवोदित साहित्यिकाने व्यक्त होण्यासाठी बोलीभाषा आणि प्रमाणभाषा दोघांचा अवलंब करायला हवा. केवळ प्रमाणभाषेचा अवलंब करणे माझ्या मते योग्य नाही. बोलीभाषेला प्रमाणभाषेची किनार असेल तर ते साहित्य सर्वांना आपलेसे वाटेल, असा सल्लाही यावेळी कृष्णा पाटील यांनी नवोदित साहित्यिकांना दिला.
