जळगाव - शहरात दोन वेगवेगळ्या घटनांमध्ये दोन तरुणांनी आत्महत्या केली आहे. खंडेराव नगरातील रमेश दगडू भोई (वय ३५, मूळ रा. नशिराबाद, ता. जळगाव) या तरुणाने नैराश्यातून रेल्वेखाली झोकून देत आत्महत्या केली. तर दुसऱ्या घटनेत काम शोधण्यासाठी जळगावात आलेल्या भिम मुन्ना राठोड (वय ३०, रा. उमऱ्या, ता. शिरपूर) या तरुणाने कौटुंबिक वादातून गळफास घेवून आत्महत्या केली.
जळगाव शहरातील खंडेराव नगरातील रहिवासी असलेला रमेश भोई हा जळगावात शेंगदाणे व फुटाणे विकण्याचे काम करत होता. कौटुंबिक वाद झाल्यामुळे त्याची पत्नी आशा ही मुलासह माहेरी निघून गेलेली आहे. पत्नी माहेरी निघून गेल्यानंतर रमेश हा खंडेराव नगरात आई कमलाबाई, वडील दगडू भोई आणि भाचा अभिजित भोई यांच्यासोबत राहत होता. गेल्या चार ते पाच वर्षांपासून पत्नी माहेरी गेल्याने नैराश्येतून गुरुवारी (६ रोजी) रात्री १२ वाजेच्या सुमारास रमेश घराबाहेर पडला. आज, शुक्रवारी सकाळी १० वाजेच्या सुमारास जळगाव-शिरसोली दरम्यान रेल्वेखाली झोकून देत त्याने आत्महत्या केल्याचे उघडकीस आले. जिल्हा वैद्यकीय रुग्णालय व महाविद्यालयात त्याचा मृतदेह शवविच्छेदन करण्यासाठी आणण्यात आला होता. शोकाकुल वातावरणात त्याच्यावर अंत्यसंस्कार करण्यात आले.
परजिल्ह्यातील तरुणाची गळफास घेवून आत्महत्या:
दुसऱ्या एका घटनेत परजिल्ह्यातील रहिवासी असलेल्या भीम राठोड या तरुणाने गळफास घेऊन आत्महत्या केली. भीम हा गेल्या दीड महिन्यापासून काम शोधण्यासाठी जळगावातील ढोर बाजार परिसरात सासऱ्यांच्या घरी आला होता. तो जळगावात दीड महिन्यांपासून बांधकाम साईटवर काम करत होता. दरम्यान, घरी कौटुंबिक वाद झाल्याने त्याने संतापाच्या भरात घराबाहेर असलेल्या झाडाला दोरीने गळफास घेवून आत्महत्या केली. भीमने आत्महत्या केल्याचे त्याच्या सासुच्या लक्षात आल्याने ही घटना उघडकीस आली. मृत भीम राठोड याच्या पश्चात पत्नी सविता, दोन मुली आणि चार वर्षाची मुलगी असा परिवार आहे. या घटनेप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
