जळगाव - दिवसभर रुग्णसेवेत असणाऱ्या जिल्हा रुग्णालयातील कर्मचाऱ्यांनी भित्तीचित्रांवर रंगकाम करत आपल्यातील कलेला वाट मोकळी केली. ही सुंदर चित्रे रुग्णालयात येणाऱ्या सर्वांचे लक्ष वेधत आहे.
हेही वाचा - जळगाव : राष्ट्रवादी काँग्रेसचे नेते मेहबूब शेखविरोधात भाजपचे आंदोलन
मन प्रसन्न करणारी चित्रे -
शासकीय वैद्यकीय महाविद्यालय आणि रुग्णालयाच्या आवारामध्ये गेल्या दहा दिवसापासून भित्तीचित्र रंगवण्याचे आणि सुशोभित करण्याचे काम सुरू आहे. जिल्हा रुग्णालयात येणाऱ्या रुग्णांना व त्यांच्या नातेवाईकांना प्रसन्न वाटावे, त्यांना उपचार घेताना प्रफुल्लित वाटावे या दृष्टीने ही चित्रे काढण्यात आली आहेत. महाविद्यालय व रुग्णालय आवारामध्ये फ्लॉवर्स व्हॅली, वारली संस्कृती, निसर्ग चित्र, तसेच वैद्यकीय क्षेत्रात काम करणाऱ्या घटकांची मांडणी करण्यात आली आहे.
या उपक्रमाचे राज्यभरातून कौतुक -
या उपक्रमाचे राज्यभरातून कौतुक होत आहे. अधिष्ठाता डॉ. जयप्रकाश रामानंद, उप अधिष्ठाता डॉ. मारुती पोटे, वैद्यकीय अधीक्षक डॉ. वैभव सोनार यांच्या मार्गदर्शनाखाली रुग्णालयातील कर्मचारी हे ओरिसातील फाईन आर्ट्सचे प्राचार्य अविनाश काटे, प्रा. वैशाली काटे यांना भित्तीचित्र रंगवण्याच्या कामात सहकार्य करीत आहेत.
कर्मचाऱ्यांनीही हातात घेतला ब्रश -
प्राचार्य अविनाश काटे यांनी स्केच केलेल्या चित्रांमध्ये कर्मचाऱ्यांनी अप्रतिम रंग भरले. यामुळे आज रुग्णालयाच्या आवारात एक वेगळेच चैतन्य निर्माण झाले होते. रंगकामात अनिल बागलाणे, प्रकाश सपकाळ, राजेंद्र करोसिया, दिनेश कंडारे, प्रमोद कोळी, राहुल सपकाळ यांचा समावेश होता.
हेही वाचा - पाचोऱ्यात हॉटेलला भीषण आग; लाखो रुपयांचे नुकसान
