जळगाव - जिल्ह्यात कोरोनाबाधित रुग्णांवर उपचारासाठी ऑक्सिजनचा मोठ्या प्रमाणावर तुटवडा भासत आहे. या समस्येवर उपाय म्हणून जिल्हा प्रशासनाच्यावतीने 10 ठिकाणी कृत्रिम ऑक्सिजन निर्मिती प्लांट उभारण्याचे नियोजन करण्यात आले आहे. यातील 5 प्लांट हे जिल्हा नियोजन समितीच्या माध्यमातून तर उर्वरित 5 प्लांट राज्य आपत्ती निवारण योजनेच्या माध्यमातून उभारले जाणार आहेत. पुढील दीड ते दोन महिन्यात हे प्लांट उभारले जातील. त्यानंतर जिल्हा ऑक्सिजन समस्येवर मात करू शकणार आहे. ऑक्सिजन प्लांट उभारणी संदर्भात प्रशासकीय प्रक्रियेला गती आली आहे.
जळगाव जिल्ह्यात कोरोनाचा संसर्ग वेगाने वाढत आहे. कोरोनाची दुसरी लाट ही आधीच्या लाटेपेक्षा अधिक तीव्र असल्याने रुग्णांना ऑक्सिजनची मोठ्या प्रमाणावर गरज भासत आहे. सद्यस्थितीत जळगाव जिल्ह्यातील रुग्ण संख्येचा विचार केला तर जिल्ह्यात 9 हजार 712 ऍक्टिव्ह रुग्ण आहेत. त्यातील 1 हजार 227 रुग्ण हे ऑक्सिजन प्रणालीवर तर 744 रुग्ण अतिदक्षता विभागात उपचार घेत आहेत. एवढ्या रुग्णसंख्येसाठी 24 तासात साधारणपणे 38 ते 40 मेट्रीक टन लिक्विड ऑक्सिजनची गरज भासत आहे. यातून साडेतीन ते चार हजार जम्बो ऑक्सिजन सिलिंडर आवश्यक असतात. परंतु, आवश्यक असलेल्या ऑक्सिजनसाठी उपलब्ध होणारा लिक्विड ऑक्सिजन हा कमी पडतो. दररोज सुमारे 8 ते 10 मेट्रीक टन लिक्विड ऑक्सिजनचा तुटवडा आहे. अशा परिस्थितीत ऑक्सिजन पुरवठ्याचे नियोजन करताना जिल्हा प्रशासन आणि आरोग्य यंत्रणेला तारेवरची कसरत करावी लागते. ऑक्सिजन तुटवड्याच्या समस्येवर कायमस्वरुपी उपाय म्हणून तसेच संभाव्य तिसऱ्या लाटेच्या पार्श्वभूमीवर जिल्हा प्रशासनाने जिल्ह्यातील वेगवेगळ्या ठिकाणी हवेतून ऑक्सिजन निर्मिती करणारे प्लांट उभारण्याचे नियोजन केले आहे.
प्लांटसाठी प्रशासकीय पातळीवर आली गती-
जिल्ह्यात कोरोनाच्या रुग्णांवर उपचारासाठी लागणाऱ्या कृत्रिम ऑक्सिजनची टंचाई लक्षात घेऊन जिल्हा प्रशासनाने हवेतून ऑक्सिजन निर्मिती करणाऱ्या प्लांट उभारण्याच्या प्रक्रियेला गती दिली आहे. पुढील दीड ते दोन महिन्यात हे प्लांट कार्यान्वित होतील, या अनुषंगाने उपाययोजना केल्या जात आहेत. प्लांट उभारणीसाठी लागणाऱ्या साहित्याची खरेदी ई-टेंडरिंगच्या तांत्रिक बाबींमध्ये न अडकवता अगोदर मंजूर झालेल्या दराने साहित्य खरेदीचे आदेश जिल्हाधिकाऱ्यांनी दिले आहेत. या संदर्भातील प्रस्तावामध्ये असलेल्या तांत्रिक चुकांची दुरुस्ती देखील युद्धपातळीवर करण्यात आली आहे. प्रस्तावांना सुधारित मान्यता देण्यात आली असून, प्लांट उभारण्याचे काम लवकरच हाती घेण्यात येणार आहे.
हेही वाचा - कोरोनाला हरवायला लसच आपल्याला मदत करेल, घरी पोहोचताच धवनने गाठलं लसीकरण केंद्र
या ठिकाणी होणार ऑक्सिजन प्लांटची उभारणी-
जळगाव तालुक्यातील मोहाडी येथील महिला रुग्णालयात 1020 एलपीएम क्षमतेचा सर्वात मोठा ऑक्सिजन प्लांट असेल. या ठिकाणी 200 ते 250 जम्बो सिलिंडर प्रतिदिन ऑक्सिजन तयार होईल. त्याचप्रमाणे चोपडा, मुक्ताईनगर, जामनेर आणि चाळीसगाव या उपजिल्हा रुग्णालयाच्या ठिकाणी प्रत्येकी 450 एलपीएम क्षमतेचे ऑक्सिजन प्लांट असतील. त्याद्वारे प्रत्येकी 100 ते 150 सिलिंडर ऑक्सिजन निर्मिती होणार आहे. याशिवाय अमळनेर, पारोळा, रावेर, भडगाव आणि धरणगाव येथील ग्रामीण रुग्णालयात 150 ते 200 एलपीएम क्षमतेचे प्लांट तयार होणार आहेत. सर्व 10 ऑक्सिजन प्लांटच्या माध्यमातून दिवसभरात एक ते दीड हजार जम्बो सिलिंडर ऑक्सिजन निर्मिती करण्याचे उद्दिष्ट आहे, अशी माहिती जिल्हा शल्यचिकित्सक डॉ. नागोराव चव्‍हाण यांनी 'ईटीव्ही भारत'शी बोलताना दिली.
7 ते 8 कोटी रुपयांची आहे तरतूद-
जिल्हाभरात 10 ठिकाणी हवेतून ऑक्सिजन निर्मिती करणाऱ्या प्लांटच्या उभारणीसाठी जिल्हा नियोजन समिती तसेच राज्य आपत्ती निवारण योजनेच्या माध्यमातून सुमारे 7 ते 8 कोटी रुपयांची तरतूद करण्यात आली आहे. कोरोनाच्या संभाव्य तिसऱ्या लाटेच्या पार्श्वभूमीवर हे नियोजन करण्यात आले आहे. त्यामुळे भविष्यात जळगाव जिल्हा ऑक्सिजनच्या बाबतीत स्वयंपूर्ण होण्याची चिन्हे आहेत. दरम्यान, भुसावळ येथील नवोदय विद्यालयाजवळ असलेल्या ट्रॉमा केअर सेंटरमध्ये स्थानिक आमदार निधीतून 170 एलपीएम क्षमतेचा हवेतून ऑक्सिजन निर्मिती करणारा प्लांट उभारण्यात आला असून, तो मागच्या आठवड्यात कार्यान्वित झाला आहे. त्यामुळे ट्रॉमा केअर सेंटरमध्ये दररोज 50 ते 75 जम्बो सिलिंडर ऑक्सिजनची निर्मिती होत असून, तेथील गरज पूर्ण होत आहे.
हेही वाचा - कोरोना संक्रमणात औषधांच्या मदतीच्या नावावर होते प्रचंड लूट, व्हा सावध
