जळगाव- जिल्ह्यातील मुक्ताईनगर पंचायत समितीचे माजी सभापती दिनकर ओंकार पाटील यांची हत्या ही राजकीय पूर्ववैमनस्यातून झाल्याचे उघड झाले आहे. मुक्ताईनगर पोलिसांसह स्थानिक गुन्हे शाखेच्या पथकाने अवघ्या तीन दिवसात या प्रकरणाचा उलगडा केला असून, एका ग्रामपंचायत सदस्यासह तिघांना अटक केली आहे. संशयित आरोपींनी एका व्यावसायिक गुन्हेगारास सुपारी देऊन हे हत्याकांड घडवले आहे. पोलीस त्या गुन्हेगाराच्या मागावर आहेत.
दिनकर पाटील यांची हत्या केल्याप्रकरणी कुऱ्हा-काकोडा ग्रामपंचायतीचा सदस्य तेजराव भास्कर पाटील (वय 47), विलास रामकृष्ण महाजन (वय 52) आणि सय्यद साबीर सय्यद शफी (वय 25), तिघे रा. कुऱ्हा-काकोडा, ता. मुक्ताईनगर अशी अटकेतील संशयित आरोपींची नावे आहेत.
दिनकर पाटील यांची धारदार शस्त्राने गळ्यावर वार करत निर्घृणपणे हत्या झाली होती. कुऱ्हा-काकोडा गावातील इंडियन ऑईलच्या पेट्रोल पंपाच्या आवारातच ही थरारक घटना घडली होती. 17 जून रोजी सकाळी ही घटना समोर आली होती. ही घटना समोर आल्यानंतर सुरुवातीपासून पोलिसांना या घटनेमागे राजकीय वाद असल्याचा संशय होता. त्यानुसार पोलीस तपास करत होते.
घटनेच्या दोन ते तीन दिवस आधी दिनकर पाटील यांच्या संपर्कात असलेल्या सर्वांचे मोबाईल सीडीआर रेकॉर्ड काढून पोलिसांनी त्यांचे स्वतंत्र जबाब नोंदवले होते. त्यात दिनकर पाटील आणि आरोपींमध्ये राजकीय वैमनस्य असल्याचे स्पष्ट झाले होते. तेथूनच पोलिसांना खरे धागेदोरे मिळाले. दरम्यान, दिनकर पाटील यांची हत्या झाल्यानंतर पोलिसांनी पेट्रोल पंपावरील सीसीटीव्ही फुटेज मिळवले होते. या फुटेजमध्ये मारेकरी चॉपरसारख्या धारदार शस्त्राने दिनकर पाटील यांच्या गळ्यावर सपासप वार करत असल्याचा थरार कैद झाला होता. हे फुटेजही पोलिसांना तपासकामी मदतीचे ठरले.
काय आहे घटनेचे मूळ?
मयत दिनकर पाटील यांनी गावातील संतोष अजबराव पाटील यांच्यासोबत मिळून संतोष मानकर नावाच्या व्यक्तीमार्फत संशयित आरोपींवर ॲट्रॉसिटीचा गुन्हा दाखल केला होता. राजकीय वर्चस्वातून हा प्रकार घडला होता. शिवाय दिनकर पाटील हे ग्रामपंचायतीच्या राजकारणात सतत हस्तक्षेप करत असत. त्याचा राग आरोपींच्या मनात होता. म्हणून दिनकर पाटील आणि संतोष पाटील यांचा काटा काढण्याचे संशयित आरोपींनी ठरवले होते. या कामासाठी तेजराव पाटील आणि विलास महाजन यांनी गावातील सैय्यद साबीर याला अडीच लाख रुपयांची सुपारी देऊन दोघांची हत्या करण्यास सांगितले होते. सय्यद साबीर याने एका व्यावसायिक गुन्हेगारास सुपारी देत दिनकर पाटील यांची हत्या घडवून आणली. मात्र, संतोष पाटील यांचा अपघात झाल्यामुळे त्यांच्या हत्येचा बेत रद्द करण्यात आल्याचेही समोर आले आहे.
गुन्ह्यात अजून काहींचा समावेश?
या गुन्ह्यात तिघांसह व्यावसायिक गुन्हेगार त्याचप्रमाणे इतर काही लोकांचा समावेश असल्याचा पोलिसांना संशय आहे. तेजराव पाटील, विलास महाजन आणि सय्यद साबीर यांना अटक केल्यानंतर पोलीस आता दिनकर पाटील यांची निर्घृणपणे हत्या करणाऱ्या व्यावसायिक गुन्हेगाराच्या मागावर आहेत.
