जळगाव - जिल्ह्यातील पारोळा शहरातील मडक्या मारुती भागातील रहिवासी शेतकरी हिरामण बाबूराव बारी (वय ७०) यांनी कर्जामुळे विष पिऊन आत्महत्या केली. ही घटना शुक्रवारी सायंकाळी समोर आली.
हिरामण बारी यांनी वंजारी खुर्द भागात असलेल्या शेतीत मका व गहू पेरणी केली होती. ते नेहमीप्रमाणे ७ तारखेला शेतात गेले होते. सायंकाळी उशिरापर्यंत ते घरी परतले नाहीत. त्यांचा लहान मुलगा देवीदास हा वडील शेतातून का आले नाहीत? म्हणून त्यांना पाहण्यासाठी शेतात गेला होता. त्याला वडील शेतातील घराच्या ओट्यावर पडलेले दिसले. त्यांच्या नाका तोंडातून फेस येत होता. वडिलांची अवस्था पाहून देवीदास घाबरला. त्याने वडिलांना रिक्षाने उपचारासाठी पारोळा कुटीर रुग्णालयात आणले. वैद्यकीय अधिकारी डॉ. योगेश साळुंखे यांनी शर्थीचे प्रयत्न केले. पण उपचारादरम्यान त्यांचा मृत्यू झाला.
हिरामण बारी हे गेल्या अनेक दिवसांपासून कर्जामुळे वैफल्यग्रस्त अवस्थेत होते. या वर्षी अतिवृष्टीमुळे हातचा सर्व हंगाम गेल्याने त्यांना निराशा आली होती. त्यांच्यावर हात उसनवारीचे ७८ हजार खासगी बँकेचे व सोसायटीचे ७५ हजार रुपये असे कर्ज होते. या कर्जबाजारीपणाला कंटाळून त्यांनी आत्महत्या केल्याची माहिती नातेवाईकांनी दिली.
पारोळा पोलिसांना सुनील बारी यांनी माहिती दिली. त्यावरून अकस्मात मृत्यूची नोंद करण्यात आली आहे. तपास पो.हे.काँ. बापूराव पाटील करीत आहे. त्यांच्या पश्चात पत्नी, तीन मुली, तीन मुले, सुना, नातवंडे असा परिवार आहे.
