जळगाव - भुसावळ येथील विद्युत इंजिन कारखान्यात (पीओएच) लवकरच रेल्वेच्या डिझेल इंजिनाचे रूपांतर हे इलेक्ट्रीक थ्रीफेज इंजिनात केले जाणार आहे. भारतीय रेल्वेत सर्वप्रथम भुसावळात हा बदल साकारणार आहे, अशी माहिती कारखाना प्रबंधक शिवराम यांनी मध्य रेल्वेचे महाव्यवस्थापक (जीएम) संजीव मित्तल यांना दिली. महाव्यवस्थापक मित्तल यांनी कारखान्याची वार्षिक पाहणी केली.
पीओएच कारखान्याने केलेल्या संशोधनात रेल्वेच्या इंजिनात मॉनिटर लावण्यात आले आहे. इंजिनात झालेल्या बिघाडाची माहिती या मॉनिटरवर दिसणार आहे. यामुळे तत्काळ दुरस्ती करणे शक्य होणार आहे. त्यामुळे कारखान्याची कामगिरी कौतुकास पात्र आहे, अशी शाबासकीची थाप मध्य रेल्वेचे जीएम संजीव मित्तल यांनी वार्षिक पाहणी दरम्यान दिली. आतापर्यंत कारखान्यातून चार इंजिनांमध्ये एसी यंत्रणेसह सीसीटीव्ही कॅमेरे लावण्यात आले असल्याचे कारखाना प्रबंधक शिवराम यांनी सांगितले. यावेळी डीआरएम विवेककुमार गुप्ता, वरिष्ठ अभियंता सुशील वावरे, कारखाना उपप्रबंधक सारिका गर्ग यांच्यासह अनेक अधिकारी उपस्थित होते. कामगिरीबद्दल समाधान व्यक्त करत मित्तल यांनी कारखान्यास दोन लाख रूपयांचे बक्षीस जाहीर केले.
बॅटरी कार इंजिन धावणार -
रेल्वेच्या एमओएच शेडलाही जीएम मित्तल यांनी भेट दिली. यावेळी एमओएचमध्ये कालबाह्य झालेल्या इंजिनात बॅटरी लावत हे इंजिन पुन्हा सुरू करण्यात आले. इलेक्ट्रीकऐवजी हे इंजिन बॅटरीवर चालणार असून ते शंटींगसाठी वापरले जाणार आहे. या इंजिनाचे उद्घाटन मित्तल यांच्याहस्ते झाले. कालबाह्य झालेल्या इंजिनात तेथील कारखाना प्रबंधक हिमांशू रामदेव यांच्या मार्गदर्शनाखाली अभियंता गोपाळ चौधरी यांनी बॅटरीच्या रूपाने जीव ओतला.
हेही वाचा - महिला दिन विशेष: मराठी भाषेच्या उन्नतीसाठी बंगाली महिलेचा पुढाकार; काय केलं ते वाचा सविस्तर....
देशात नावलौकिक भुसावळ येथील पीओएच कारखान्यात प्रथमच डिझेल इंजिनाचे रूपांतर इलेक्ट्रीक थ्री फेज इंजिनात केले जाणार आहे. यापूर्वी येथे इलेक्ट्रीक इंजिन कारखान्यात साकारले होते. ते काम बंद करून आता डिझेल इंजिनांमध्ये बदल करण्याचे काम कारखान्यात होणार आहे. त्यामुळे भारतीय रेल्वेत भुसावळचे नाव अधिक ठळकपणे नोंदवले जाईल. बदलत्या काळानुसार डिझेल इंजिनांऐवजी इलेक्ट्रीक इंजिनांचा वापर वाढवला जात असल्याने, हा बदल करण्यात आला आहे.
