जळगाव -भाजप नेते तथा माजीमंत्री एकनाथ खडसे यांच्या राष्ट्रवादी प्रवेशाची सध्या जोरदार चर्चा रंगली आहे. यासंदर्भात दररोज काहीतरी घडामोडी घडत असतानाच, आज राष्ट्रवादी काँग्रेसचे प्रदेशाध्यक्ष जयंत पाटील यांनी पंतप्रधान नरेंद्र मोदी यांच्यावर टीका करणारे एक क्विट त्यांच्या ट्विटर अकाउंटवरून केले होते. जयंत पाटील यांचे तेच ट्विट भाजपा नेते एकनाथ खडसे यांनी रिट्विट केले. त्यामुळे खडसे अॅक्शन मोडमध्ये आल्याची चर्चा रंगली असून, त्यांनी एकप्रकारे भाजपला सोडचिठ्ठी देत असल्याचे अप्रत्यक्ष संकेतच दिले आहेत. मात्र, ते ट्विट नंतर डिलीट करण्यात आले आहे.
जयंत पाटील यांनी ट्विटरवर केलेल्या ट्विटमध्ये म्हटले आहे की 'आजच्या भाषणात पंतप्रधान काहीतरी नवीन सांगतील. कोरोना व आर्थिक संकटावर मात करण्यासाठी मार्ग देतील. अतिवृष्टीमुळे नुकसान झालेल्या महाराष्ट्रातील शेतकऱ्यांना दिलासा देतील असे वाटले होते. मात्र, यापैकी त्यांनी काहीच केले नाही. महाराष्ट्राचा, देशाचा भ्रमनिरास केला'. अशी टीका जयंत पाटील यांनी आपल्या ट्विटद्वारे नरेंद्र मोदी यांच्यावर केली होती.
महत्त्वाचे म्हणजे, भाजपचे नाराज नेते एकनाथ खडसे यांनी जयंत पाटील यांचे ट्विट रिट्विट केले. त्यामुळे एकनाथ खडसे यांचा राष्ट्रवादी प्रवेश लवकरच होईल, असा अंदाज बांधला जात आहे. खडसेंनी आतापर्यंत कधीही पंतप्रधान नरेंद्र मोदींवर टीका-टिप्पणी किंवा नाराजी व्यक्त केलेली नव्हती. परंतु, त्यांच्या पक्षांतराची चर्चा सुरू असतानाच त्यांनी प्रथमच थेट नरेंद्र मोदींवर अप्रत्यक्षपणे टीका केल्याने चर्चा रंगली होती.
एकनाथ खडसे हे राष्ट्रवादीत प्रवेश करणार का नाही याबाबत चर्चा सुरू असतानाच त्यांनी केलेले पाटील यांचे पंतप्रधान मोदींवरील रिट्विट केले. मात्र त्यानंतर ते ट्विट त्यांनी तत्काळ डिलीट केले असल्यामुळे खडसेंच्या प्रवेशाबाबत संदिग्ध भूमिका निर्माण झाली आहे. जयंत पाटलांचे ते ट्विट रिट्विट करून खडसे भाजपमध्ये दबाबतंत्र निर्माण करण्याचा प्रयत्न तर करत नाहीत ना? असा प्रश्न आता चर्चिला जाऊ लागला आहे.
