जळगाव - शहरातील तांबापुरा भागात दोन गटात हाणामारी होऊन तुफान दगडफेक झाल्याची घटना शनिवारी सकाळी घडली. या घटनेत तीन जण जखमी झाले आहेत. घटनेची माहिती मिळताच एमआयडीसी पोलिसांनी धाव घेत परिस्थिती नियंत्रणात आणली. त्यामुळे अनर्थ टळला. याप्रकरणी पोलिसांनी चार ते पाच जणांना चौकशीसाठी ताब्यात घेतले आहे. शुक्रवारी मध्यरात्री तरुण एकट्या असलेल्या महिलेच्या घरात शिरला होता. याच कारणावरुन वाद झाल्याचे पोलिसांच्या प्राथमिक चौकशीत समोर आले आहे.
पोलिसांनी दिलेल्या माहितीनुसार, भोलासिंग बावरी हा मद्याच्या नशेत शुक्रवारी मध्यरात्री दोन वाजता रवींद्र बाबुराव हटकर यांच्या घरात घुसला होता. त्यामुळे रात्री घरात एकटी असलेली महिला प्रचंड घाबरली होती. महिलेने आरडा-ओरड केल्यामुळे शेजारी लोकांची गर्दी झाली होती. हे पाहून भोलासिंग हा पळून गेला होता. यानंतर शनिवारी सकाळी भोलासिंग गल्लीतून जात असताना महिलांनी त्याला जाब विचारला. याचा राग आल्याने भोलासिंग याने दगडफेक केली. त्यानंतर बावरी आणि हटकर गट आमनेसामने आल्याने वाद वाढला. हाणामारी होऊन तुफान दगडफेक झाली. त्यात भोलासिंग बावरी, जगजितसिंग बावरी व उखा हटकर हे तीन जण जखमी झाले.
या घटनेची माहिती मिळाल्यानंतर सहाय्यक पोलीस अधीक्षक डॉ. नीलाभ रोहन, एमआयडीसी पोलीस ठाण्याचे पोलीस निरीक्षक विनायक लोकरे यांनी कर्मचाऱ्यांसह घटनास्थळी धाव घेतली. पोलिसांनी जगजितसिंग हरिसिंग बावरी (५०), समकौर जगजितसिंग बावरी (४५), सोनुसिंग जगजितसिंग बावरी २५), मोहनसिंग जगजितसिंग बावरी (सर्व रा. सिकलकरवाडा, तांबापुरा) या चौघांना ताब्यात घेतले. जखमींना रुग्णालयात हलविण्यात आले.
या घटनेमुळे तांबापुरात प्रचंड तणाव निर्माण झाला. दोन्ही गटांकडून तुफान दगडफेक झाल्यामुळे इतर नागरिकांची पळापळ झाली. रस्त्यावर दगड, विटांचा खच पडला होता. दरम्यान, कोणत्याही प्रकारचा अनुचित प्रकार घडू नये, म्हणून पोलिसांचा बंदोबस्त ठेवण्यात आला आहे. याप्रकरणी उशिरापर्यंत गुन्हा दाखल करण्यात आला नव्हता.
