जळगाव - कोरोनासारख्या कठीण काळात लोकांना मदत करणे सोडून राज्यातील सत्ताधारी घरात बसले आहेत. सत्ताधाऱ्यांना सर्वसामान्य लोकांची चिंता नसेल पण आम्हाला आहे. त्यांनी कितीही टीका केली तरी लोकांना हे बरं वाटतंय की कुणीतरी येऊन आमचं दुःख पाहतंय. आम्ही राजकारण काँग्रेस-राष्ट्रवादीसाठी करत नाही तर जनतेसाठी करतो. जनतेच्या समस्या, अडचणी जाणून घेण्यासाठी कितीही गंभीर परिस्थिती असली तरी आम्ही त्यांच्यापर्यंत जाणारच आणि त्यांना दिलासा देणार, अशा शब्दांत राज्याचे विरोधी पक्षनेते देवेंद्र फडणवीस यांनी काँग्रेस आणि राष्ट्रवादीकडून होणाऱ्या टीकेला आज जळगावात जोरदार प्रत्युत्तर दिले.
कोरोनाच्या पार्श्वभूमीवर देवेंद्र फडणवीस हे राज्याचा दौरा करत आहेत. या दौऱ्यात गुरुवारी जळगावात असताना ते प्रसारमाध्यमांशी बोलत होते. यावेळी फडणवीस यांनी सत्ताधारी, राज्यासह जळगाव जिल्ह्यातील कोरोनाची परिस्थिती, कोरोनासाठीच्या उपाययोजना अशा विषयांवर मते मांडली. देवेंद्र फडणवीस सुरुवातीला विशेष कोविड रुग्णालय असलेल्या शासकीय वैद्यकीय महाविद्यालयात पाहणी केली. यावेळी त्यांच्यासोबत विधानपरिषदेचे विरोधी पक्षनेते प्रवीण दरेकर, आमदार गिरीश महाजन यांच्यासह जिल्ह्यातील भाजपचे खासदार, आमदार तसेच पदाधिकारी उपस्थित होते.
यावेळी त्यांनी रुग्णालय प्रशासनाकडून कोरोना रुग्णांच्या उपचाराबाबत आढावा घेतला. त्यानंतर जिल्हाधिकारी कार्यालयात जावून जिल्हाधिकारी अभिजित राऊत यांच्याशी कोरोनाचा वाढता संसर्ग, बाधितांचा वाढता मृत्यूदर व संसर्ग रोखण्यासाठी प्रशासनाकडून करण्यात येणाऱ्या उपाययोजनांची माहिती जाणून घेतली. जिल्ह्यात टेस्टिंग वाढविण्याबाबत सूचनाही त्यांनी यावेळी केल्या.
हेही वाचा - जळगावात झालेल्या वाहन अपघातात प्रवीण दरेकर जखमी; खासगी रुग्णालयात केली तपासणी
जळगावात ठोस उपाययोजनांची गरज...
जिल्हाधिकाऱ्यांसोबत बैठक झाल्यानंतर फडणवीस यांनी पत्रकारांशी संवाद साधला. त्यांनी सांगितले की, जळगाव जिल्ह्यातील वाढती रुग्णसंख्या आणि मृत्यूदर काळजी करण्यासारखा आहे. त्यामुळे येथे मोठ्या प्रमाणात टेस्टिंग वाढविण्याची गरज आहे. सध्या प्रमाणापेक्षा कमी टेस्टिंग होत असल्याबद्दल त्यांनी नाराजी व्यक्त केली. टेस्टिंगचे अहवाल चार-चार दिवस येत नसल्याने संसर्ग वाढून रुग्णांना वेळेवर उपचार मिळत नाही. त्यामुळे 24 तासात अहवाल येणे आवश्यक असल्याचेही फडणवीस यांनी सांगितले. जिल्ह्यासाठी रुग्णवाहिका देखील कमी असल्याने रुग्णांचे मृत्यू झाल्याची घटना घडल्या आहेत. त्यामुळे रुग्णवाहिका वाढविण्याची मागणीही आम्ही केली. रुग्णांच्या जेवणाची व्यवस्था उशिरा होते. वाहनांना वेळेवर डिझेल मिळत नाही, अशा तक्रारी जळगावात असल्याचेही ते म्हणाले.
नॉन कोविड रुग्णांची समस्या मोठी...
जळगाव जिल्ह्यात कोविड रुग्णांपेक्षा नॉन कोविड रुग्णांची समस्या मोठी असल्याचा आरोप फडणवीस यांनी केला. शासकीय रुग्णालय पूर्णपणे कोविड रुग्णालय म्हणून घोषित केल्याने नॉन कोविड रुग्ण जळगाव शहरापासून दूर असलेल्या डॉ. उल्हास पाटील रुग्णालयात पाठविले जातात. तेथे त्यांचे हाल होतात, तेथे मोठ्या प्रमाणात पैसे घेतले जात असल्याच्या तक्रारी आमच्याकडे आल्याची माहिती देवेंद्र फडणवीस यांनी दिली.
ऑनलाईन शिक्षणाबाबत उपाययोजना हव्यात...
हेही वाचा - 'कोरोनाच्या संकटात दिलासा... गावगाड्यातील माणसाला मिळणार अतिरिक्त पाणी'
ऑनलाईन शिक्षण देणे ठीक आहे. पण त्यात अनेक अडचणी आहेत. अनेक विद्यार्थी या सुविधेपासून वंचित राहत आहे. त्यामुळे याचा देखील सरकारने विचार करण्याची गरज आहे. अन्यथा शिक्षण क्षेत्रात मोठी विसंगती यातून तयार होईल. ऑनलाईन शिक्षणाबाबत न्यायालयाने दिलेल्या निर्देशांचे पालन करणे गरजेचे असल्याचेही फडणवीस यांनी सांगितले. दरम्यान, यावेळी पत्रकारांनी खासगी शाळांचे आरटीईचे सरकारकडे अडकलेल्या पैशांच्या विषयाबाबत फडणवीस यांना विचारणा केली असता त्यांनी, कोणत्याही शाळेला आरटीईचे प्रवेश आणि प्रक्रियेला नकार देत येत नाही, असे सांगून सरकारकडे अडकलेल्या पैशांबाबत बोलण्यास नकार दिला.
अवघ्या 10 मिनिटात आटोपली कोविड रुग्णालयाची पाहणी...
देवेंद्र फडणवीस यांनी अवघ्या 10 मिनिटात कोविड रुग्णालयाच्या पाहणीचा सोपस्कार पार पाडला. कोविड रुग्णालयात त्यांनी 1 आणि 13 क्रमांकाच्या वॉर्डाची बाहेरूनच पाहणी केली. रुग्णालयातील उपाययोजनांची माहिती घेत त्यांनी काढता पाय घेतला. कोरोनाबाधित रुग्णांच्या वॉर्डात जाऊन रुग्णांशी चर्चा करणे, त्यांच्या अडचणी जाणून घेणेही त्यांनी टाळले. धक्कादायक बाब म्हणजे, ते पाहणी करत असताना भाजपचे नेते, पदाधिकारी, कार्यकर्ते तसेच अधिकाऱ्यांची मोठी गर्दी उसळली होती. यावेळी 'फिजिकल डिस्टन्सिंग'चा पुरता फज्जा उडाला होता.
