जळगाव - शहरातील सागर पार्कच्या जागेच्या मुद्द्यावरून महापालिकेतील सत्ताधारी भाजप आणि विरोधीपक्ष शिवसेनेत शीतयुद्ध रंगले असून, एकमेकांवर आरोप प्रत्यारोपांच्या फैरी झडत आहेत. सागर पार्कच्या जागेचे आरक्षण काढण्यासाठी महाविकास आघाडीच्या सरकारकडून आयुक्तांवर दबाव टाकण्यात येत असल्याचा आरोप आमदार सुरेश भोळे यांनी केला होता. तसेच त्यांनी यासंदर्भात शहरातील एका वकिलांची नार्कोटेस्ट करण्याची मागणी केली होती. याच मुद्द्यावरून मंगळवारी (दि. 8 डिसें.) शिवसेनेचे गटनेते अनंत जोशी यांनी आमदार भोळेंना लक्ष्य केले. 'वकिलांपेक्षा आमदार सुरेश भोळे यांचीच नार्कोटेस्ट करण्याची गरज आहे. म्हणजे सागरपार्क, वॉटरग्रेस यासह अनेक सत्य बाहेर येथील', अशा शब्दात जोशी यांनी आमदार भोळेंवर हल्लाबोल केला आहे.
आमदार भोळे यांनीच थांबवून ठेवल्याचा आरोप
महापालिकेत विरोधी पक्षनेत्यांच्या दालनात शिवसेनेचे गटनेते अनंत जोशी व नगरसेवक नितीन बरडे यांनी मंगळवारी दुपारी पत्रकार परिषद घेतली. यावेळी दोघांनी आमदार सुरेश भोळे यांच्या आरोपांना उत्तरे दिली. यावेळी नितीन बरडे म्हणाले, महापालिकेने सागर पार्क मैदानाची जागा रितसर न्यायालयीन लढ्याने जिंकली आहे. या जागेबाबत लुंकड परिवाराने मोबदला मागितला आहे. ही जागा महापालिकेचीच असल्याने आयुक्त महापालिकेच्या हिताचाच अहवाल पाठविणार आहेत. त्यामुळे 100 कोटी देण्याचा प्रश्नच येत नाही, असे बरडे यांनी सांगितले. तसेच सागरपार्क या जागेवर महापालिकेने मैदानाच्या सुशोभिकरणासाठी 2017 मध्ये निविदा प्रक्रिया पूर्ण केली होती. मात्र, आज तीन वर्षे झाले हे काम आमदार भोळे यांनीच थांबवून ठेवल्याचा आरोपही त्यांनी केला.
अनंत जोशींनी केला गौप्यस्फोट
यावेळी अनंत जोशी यांनी आमदार भोळे यांच्यावर थेट हल्लाबोल करत सांगितले की, सागरपार्कचे काम थांबविण्यात आमदार भोळे यांचा चांगला हेतू नव्हता. त्यांनीच काम थांबवण्यास सांगितले होते. याची माहिती आपणास तत्कालीन अधिकाऱ्यांनी देखील दिल्याचा गौप्यस्फोट देखील अनंत जोशी यांनी केला.
वकिलाची कशाला, आमदारांची नार्को टेस्ट व्हावी
आमदार सुरेश भोळे यांनी एका ज्येष्ठ वकिलांची नार्को टेस्ट करावी, अशी मागणी केली होती. मात्र, या वकिलांची नार्कोटेस्ट करण्यापेक्षा आमदार भोळेंचीच नार्को टेस्ट करावी, म्हणजे सागरपार्क, वॉटरग्रेस व भाजपच्या महापालिकेच्या सत्तेतील दोन वर्षांच्या काळातील अनेक सत्य बाहेर येतील, असा टोलाही अनंत जोशी यांनी पत्रकार परिषदेत लगावला. वॉटरग्रेस कंपनीने जर साई मार्केटींग कंपनीला शहराच्या स्वच्छतेसाठी उपठेका दिला असेल तर त्यांच्यावर कारवाई करावी, असेही यावेळी नितीन बरडे व अनंत जोशी यांनी सांगितले.
हेही वाचा - जळगावात आठ महिन्यांनंतर वाजली शाळांची घंटा; पहिल्या दिवशी विद्यार्थ्यांची अल्प उपस्थिती
हेही वाचा - नवीन कृषी कायद्यातील वादग्रस्त मुद्दे वगळावेत; जळगावातील शेतकऱ्यांची अपेक्षा
