जळगाव - तालुक्यातील शिरसोली गावाच्या शिवारात असलेल्या जंगलात आज (बुधवारी) रात्री 10 वाजेनंतर अचानक वणवा पेटला. त्यामुळे सुमारे दोन किलोमीटरपर्यंतचे जंगल आगीच्या भक्ष्यस्थानी पडून मोठ्या प्रमाणावर वनसंपदेचे नुकसान झाले. ही आग विझवण्यासाठी शिरसोली, मोहाडी गावातील ग्रामस्थांसह जळगाव महापालिका, जैन इरिगेशन कंपनीच्या अग्निशमन दलाच्या जवानांनी शर्थीचे प्रयत्न केले. रात्री उशिरापर्यंत आग आटोक्यात आणण्यासाठी प्रयत्न सुरू होते.
जळगाव शहरापासून काही अंतरावर असलेल्या शिरसोली रस्त्यावर रुस्तमजी इंटरनॅशनल स्कूल आहे. या शाळेच्या परिसरातील जंगलात आज रात्री 10 वाजेच्या सुमारास अचानक आग लागली. जळगाव महापालिकेच्या अग्निशमन बंबांसह शिरसोली व मोहाडी येथील ग्रामस्थांनीही आग विझवण्यासाठी शर्थीचे प्रयत्न केले.
आगीचे कारण अस्पष्ट-
जंगलाला अचानकपणे आग लागली. आग कशामुळे लागली? हे समजू शकले नाही. बघता बघता दीड ते दोन किलोमीटर पर्यंतच्या जंगलात ही आग वेगाने पसरली. आगीचा प्रकार लक्षात येताच काही ग्रामस्थांनी जळगावातील महापालिकेच्या अग्निशमन दलाला घटनेची माहिती दिली. या दरम्यान, मोहाडी गावातील ग्रामस्थ मोठ्या संख्येने ही आग विझविण्यासाठी घटनास्थळी धाव घेतली.
ग्रामस्थांनी झाडांच्या फांद्या तोडून आग विझवण्यासाठी शर्थीचे प्रयत्न केले. यानंतर घटनास्थळी पोहचलेल्या दोन अग्निशमन बंबांच्या सहाय्याने आग विझवण्याचे काम सुरू करण्यात आले.
