जळगाव - देशभरात आचारसंहिता लागू झाली आहे. निवडणुकीच्या तारखा जाहीर झाल्या आहेत. पण, अजूनही जळगाव मतदारसंघासाठी भारतीय जनता पक्षाला योग्य उमेदवार मिळत नाही. काँग्रेसने माजी मंत्री गुलाबराव देवकरांना उमेदवारी दिली आहेत. पण, भाजप अद्याप सक्षम पर्याय देऊ शकले नाही. दुसरीकडे रावेरमध्ये एकनाथ खडसेंच्या भूमिकेकडे सर्वांचे लक्ष लागले आहे.
जळगावमधून सलग १० वर्षे खासदार असणारे ए.टी. पाटील यावेळी भाजपची पसंती नाहीत. त्यांना पक्षातूनच विरोध होत आहे. त्यामुळे नवा उमेदवार शोधण्याची पाळी भाजपवर आली आहे. अशातच काँग्रेसने उमेदवार जाहीर करुन पहिला डाव खेळला आहे. भाजपकडून नावांची चाचपणी सुरु आहे. अभियंता प्रकाश पाटील, जिल्हा परिषद सदस्या स्मिता वाघ आणि गिरीश महाजनांच्या पत्नी साधना महाजन यांची नावे चर्चेत आहेत. यातील प्रकाश पाटील यांना पक्षाकडून निरोप गेल्याचेही सांगण्यात येत आहे. पण, अजून कुठल्याही नावावर शिक्कामोर्तब झाले नाही.
जळगाव मतदारसंघामध्ये शिवसेनेची चांगली ताकद आहे. त्यामुळे शिवसेनेने जळगाव मतदारसंघाची मागणी केली होती. त्या दृष्टीने त्यांनी तयारी देखील सुरू केली होती. पण, ऐनवेळी युतीची घोषणा झाली. त्यामुळे शिवसेनेच्या मनसुब्यावर पाणी फिरले आहे. शिवसेना बंड करेल असे दिसत होते. पण, आता शिवसेनेच्या गोटात शांतता आहे. त्यामुळे त्यांनी युतीचा कौल स्वीकारल्याचे दिसत आहे.
दरम्यान, भाजपचे ज्येष्ठ नेते एकनाथ खडसे यांच्या भूमिकेकडे सर्वांचे लक्ष आहे. रावेर मतदारसंघातून खडसेंच्या सून रक्ष खडसे खासदार आहेत. खडसे आणि भाजपच्या नेत्यांमध्ये सतत कुरबुरी सुरु असतात. त्यामुळे भाजप खडसेंना पुन्हा संधी देईल का याबद्दल शंका होती. पण, मुख्यमंत्री नुकतेच भुसावळला जाऊन आले त्यामुळे खडसेंच्या उमेदवारीबाबत आशा पल्लवीत झाल्या आहेत. तसेच, भाजपलाही खडसेंशिवाय पर्याय नसल्याचे बोलले जात आहे. तरीही रावेरमधून अजूनही भाजपने उमेदवारी घोषीत केली नाही.
