जळगाव - कारागृहात असलेल्या नातेवाईकांना जेवणाचा डबा देण्यासाठी गेलेल्या 2 तरुणांवर तलवरीने प्राणघातक हल्ला झाला आहे. ही घटना सोमवारी दुपारी 2 वाजता जिल्हा उपहारागृहाबाहेर घडली. या घटनेमुळे एकच खळबळ उडाली आहे. सनी जाधव व रणजीत इंगळे अशी हल्ल्यात जखमी झालेल्या तरुणांची नावे आहेत.
सोमवारी दुपारी सनी व रणजीत हे दोघे कारागृहाच्या बाहेर आले होते. त्याचवेळी एका चारचाकीतून 4 तरुण देखील तेथे आले. कारागृहाच्या गेटजवळ सर्वजण उभे असताना डबा देण्याच्या कारणावरुन त्यांच्यामध्ये बाचाबाची झाली. यानंतर चारचाकीतून आलेल्या तरुणांनी थेट सनी, रणजीत यांच्यावर तलवारीने हल्ला चढवला. या हल्ल्यात दोघांच्या डोक्याला गंभीर दुखापत झाली. हल्ला केल्यांनतर काही सेकंदातच चारही हल्लेखोर पळून गेले. यानंतर सनी व रणजीत या दोघांना उपचारासाठी शासकीय वैद्यकीय महाविद्यालय व रुग्णालयात दाखल करण्यात आले.
या ठिकणी त्यांच्यावर प्राथमिक उपचार केल्यानंतर त्यांना गोदावरी रुग्णालयामध्ये हलवण्यात आले. दरम्यान, या दोघांनी जिल्हापेठ पोलिसांशी संपर्क साधून तक्रार केली आहे. पोलिसांनी त्यांचा उपचार करण्याचा मेमो दिला आहे. उशिरापर्यंत दोघांचे जबाब नोंदवले गेले नव्हते. या घटनेमुळे शहरात प्रचंड खळबळ उडाली आहे.
कारागृहात गांजा, सिगारेट पोहोचवण्यावरुन वाद झाल्याची शक्यता -
कारागृहात काही कैद्यांना गांजा, सिगारेट पोहोचवण्यासाठी चारचाकीने तरुण आलेले होते. दरम्यान, पोलिसांनी त्यांना रोखले. याचवेळी सनी व रणजित तेथे उभे असल्याने एकमेकांना खुन्नस देण्यावरुन हा वाद झाल्याची शक्यता आहे. दरम्यान, कारागृहात कैद्यांपर्यंत गांजा, सिगारेट पोहोचवल्या जात असल्याचे या घटनेतून समोर आले आहे.
