हिंगोली - मागील ३ ते ४ वर्षांपासून होत असलेल्या अत्यल्प पर्जन्यमानाचा फटका जिल्ह्यातील फळ बागायतदारांना झाला आहे. मात्र, अशा परिस्थितीत पाण्याचे अतिशय बारकाईने नियोजन करून हिंगोली परिसरात भांडेगावातील शेतकऱ्यांनी दरवर्षी ३ ते ४ लाखांचे उत्पन्न मिळवले आहे. आता भांडेगावातील संत्र्याला बंगळुरुच्या बाजारपेठेत मागणी वाढली आहे.
मोठ्या प्रमाणात तळे असल्याने हिंगोली परिसरात भांडेगावाची ओळख सदनशील गाव म्हणून आहे. याच गावातील रामा काळे यांनी २ एकरात ७ वर्षांपूर्वी संत्र्याची १०० झाडे लावली. दुसऱ्याच वर्षीपासून संत्र्याचा बार लागला अन् उत्पन्नास सुरुवात झाली. त्यांना वर्षाला दोन ते अडीच लाख रुपयाचे उत्पादन मिळू लागले होते. मात्र, मागील ३ ते ४ वर्षांपासून जिल्ह्यात अत्यल्प पर्जन्यमान झाल्याने अल्पशा पाण्यावर संत्रा बाग जगविणे चांगलेच जिकरीचे होऊन बसले होते. परिसरात असलेले २ तलाव उन्हाळ्यात तळगाठत असल्याने बऱ्याच शेतकऱ्यांच्या संत्रा बागा वाळून गेल्या. नाईलाजेने त्यांच्यावर कुऱ्हाड चालविण्याची वेळ शेतकऱ्यांवर येऊन ठेपली. मात्र, काळे यांनी जराही खचून न जाता बोअरच्या माध्यमातून पाण्याचे योग्य नियोजन केले. पाणीही वेळेत मिळू लागल्याने संत्र्याला बार ही चांगला लागू लागला.
यंदा समाधानकारक भाव मिळाला असून, बंगळुरुच्या बाजारात या संत्र्याला सर्वाधिक जास्त मागणी असल्याचे काळे यांनी सांगितले. तसेच, संत्र्यामध्ये अंतर पीक म्हणून भाजीपाला वर्गीय पीक घेतात. भाजीपाला वर्गीय पिकासह संत्रा आणि पारंपरिक पीकातून वर्षाकाठी १० ते १२ लाखांचे उत्पन्न हमखास मिळत असल्याचे काळे म्हणतात. शेती ही अगदी नियोजन पद्धतीने केली तर हमखास उत्पन्न देते. शेतकऱ्यांनी मनात नकारात्मक भावना न आणता नीट नियोजन करून आणि जिद्दीने शेती केली तर शेतीत मोठे उत्पन्न मिळते याचे उदाहरण रामा काळे यांनी दिले आहे.
