हिंगोली - लोकसभा निवडणुकीचे बिगूल वाजलेले असतानाही हिंगोली मतदार संघात मात्र बहुजन वंचितचा उमेदवार सोडला तर कोणत्याच पक्षाच्या उमेदवाराचे नाव जाहीर झालेले नाही. त्यातच काँग्रेसचे राजीव सातव यांचे तळ्यात मळ्यात आहे. तर शिवसेनेला जागा निश्चित असतानाही सातव यांच्यापुढे तगडा उमेदवारच अद्यापही मिळालेला नाही. त्यामुळे शिवसेनेवर उमेदवार शोधण्याची वेळ आली आहे.
हिंगोली लोकसभा निवडणुकीकडे अख्या महाराष्ट्राचे लक्ष लागले आहे. शिवसेनेकडे राजीव सातव यांना झुंज देणारा नेता शोधून सापडलेला नाही. भाजपकडे सातवांना झुंज देणाऱ्या माजी मंत्री सूर्यकांता पाटील, माजी खासदार अन् माहूर गडाचे योगी शाम भारती, असे दिग्गज इच्छूक आहेत. विशेष म्हणजे या मतदार संघात सिंचन वगळता, रस्ते, वीज ही कामे झालीत. त्यामुळे काही प्रमाणात का होईना ? भाजपसाठी हिंगोली लोकसभा मतदार संघात अनुकूल वातावरण आहे.
हिंगोली मतदार संघात काँग्रेसचे राजीव सातव यांनी किती विकास कामे केली, तसेच कोणत्या मतदारांच्या भेटी घेतल्या हादेखील एक संशोधनाचा विषय आहे. विशेष म्हणजे सातव यांच्यावर गुजरात प्रभारीपदाची जबाबदारी दिल्यानंतर त्यांची मतदार संघातील पकड हळूहळू कमी होत चालली आहे. त्यामुळेच सातव यांना त्यांच्याच बालेकिल्ल्यात तारेवरची कसरत करावी लागणार आहे.
हिंगोलीचे माजी आ. भाऊराव पाटील गोरेगावकर यांच्यासोबत सातवांचे संबंध सर्वश्रृत आहेत. मागील काळात तर स्थानिक संस्थेच्या निवडणुका पाहता नगरपालिका आणि पंचायत समित्यांमध्ये तर शिवसेनेने काँग्रेसला धूळ चारली. तर औंढा नागनाथ नपमध्ये शिवसेना-भाजपची सत्ता आहे. तर सेनगाव अन् हिंगोली आघाडीच्या ताब्यात असली, तरीही माजी आ. भाऊराव पाटील यांचाच बोलबाला आहे. एकंदरित जिल्ह्यात शिवसेनेचे स्थानिक स्वराज्य संस्थेवर दबदबा आहे. मात्र जिल्ह्याचे मिनी मंत्रालय असलेल्या जिल्हा परिषदेत काँगेस-राष्ट्रवादीसोबत सत्तेसाठी केलेली अभद्र युती अन् सुरू असलेला आलबेल कारभार जिल्ह्यात चर्चेत आहे.
शिवसेनेच्या महिला सदस्यांच्या पतीने एका अधिकाऱ्याला केलेली मारहाण अन् काँग्रेसचे आमदार डॉ. संतोष टारफे यांच्या खासगी स्वीय सहाय्यकास निवेदनावरून केलेली मारहाण, या दोन घटना अजूनही जनतेच्या लक्षात आहेत. वसमतचे शिवसेना आमदार डॉ. जयप्रकाश मुंदडा यांच्यात मागील काळात जि. प.च्या कारभारातील हस्तक्षेपही चांगलाच महागात पडणार आहे. सध्या तरी लोकसभा निवडणुकीसाठी शिवसेनेत दोन गट पडल्याचे पहावयास मिळते. एक गट पत्रकार परिषदा घेऊन हिंगोलीचाच उमेदवार अन्यथा बंडखोरीची भाषा बोलत आहे. तर दुसरा गट माजी खासदार सुभाष वानखेडे यांच्या समर्थनात मातोश्रीपर्यंत लॉबिंग करीत असल्याची चर्चा मतदार संघात सुरू आहे. त्यातच लोकसभेसाठी गुडघ्याला बाशिंग बांधून असलेल्या एका बंजारा नेत्याला एका महामंडळाचे पद देऊन चिडीचूप करण्यात आले आहे. एवढी परिस्थिती असूनही शिवसेनेला अद्याप सातव यांच्यासारख्या खासदाराला टक्कर देण्यासाठी सक्षम उमेदवारच भेटला नाही ? याची जोरदार चर्चा मतदार संघात सुरू आहे.
