हिंगोली - जिल्ह्यातल्या हट्टा पोलीस ठाणे हद्दीत सुरू असलेल्या दोन हाय प्रोफाईल जुगार अड्ड्यावर पोलिसांनी छापेमारी केली. या छाप्यात पोलिसांनी 1 लाख 42 हजारांचा मुद्देमाल जप्त केला असून, 17 जणांना ताब्यात घेतले आहे. हा जुगार अड्डा अनेक दिवसांपासून सुरू असल्याची माहिती पोलिसांना मिळाली होती. मिळालेल्या माहितीनुसार पोलिसांनी घटनास्थळी छापा टाकला.
पहिल्या घटनेत आडगाव शिवारात सुरू असलेल्या जुगार अड्ड्यावर छापा मारण्यात आला. घटनास्थळावरून 23 हजारांचे मोबाईल, एक दुचाकी आणि जुगार साहित्य असा एकूण 69 हजार 900 रुपयांचा मुद्देमाल जप्त करण्यात आला. तर दामोदर विर, पंजाब चव्हाण, ज्ञानोबा रामराव चव्हाण, बालासाहेब तुकाराम चव्हाण, अकबर शेख मुसा, सुनील त्र्यंबकराव चव्हाण, निवृत्ती केशवराव पंडित, दत्तराव गंगाराम चव्हाण आणि दत्ता ज्ञानोबा चव्हाण सर्व राहणार तुळजापूर वाडी तालुका वसमत यांना ताब्यात घेण्यात आले आहे.
दुसऱ्या घटनेमध्ये पोलिसांनी हट्टा शिवारातील गंगाधर खाडे यांच्या शेतात सुरू असलेल्या जुगार अड्ड्यावर छापा मारला. या छाप्यात पोलिसांनी घटनास्थळावरून गंगाधर अर्जुन खाडे, बाळू रामराव देशमुख, शेख कदीर शेख जानी, सय्यद इब्राहिम सय्यद जफार, राष्ट्रपाल शंकर खाडे आणि सुनील खाडे सर्व राहणार हट्टा यांना ताब्यात घेतले. त्यांच्याकडून 72 हजार 660 रुपयांचा मुद्देमाल जप्त करण्यात आला आहे.
