हिंगोली - शहर वाहतूक शाखेत नव्यानेच रुजू झालेले पोलीस निरीक्षक ओमकांत चिंचोळकर यांच्यामुळे वाहतुकीला शिस्त लागत आहे. मात्र, वाहतूक शाखेचे कर्मचारी बेशिस्त झाल्याचे दिसून येत आहे. पोलीस कर्मचारी वाहन चालकांना कारवाई करताना चक्क शिव्या देत आहेत. याबाबतचा व्हिडीओ व्हायरल झाल्याने अशा कर्मचाऱ्यांवर प्रशासन काय कारवाई होणार याकडे सर्वांचे लक्ष लागले आहे.
हिंगोली येथील वाहतूक शाखेत पो.नि चिंचोळकर रुजू होताच बेशिस्त चालकांवर कारवाईचे प्रमाण वाढले. तसेच यातून लाखो रुपयांचा दंडही वसूल झाला आहे. मागील ६ मार्चपासून तर वाहन चालकांना पोलिसांनी भांबावून सोडले आहे. परंतु, ही कारवाई करताना पोलीस आपण जनतेचे सेवक आहोत हे विसरुन चालले आहेत. एका दुचाकी चालकाने उलट प्रश्न विचारला असता त्याचे उत्तर द्यायचे सोडुन या पोलीसाने त्याला शिवीगाळ केली. दुचाकीस्वाराच्या खिशाला असलेल्या कॅमेऱ्यामध्ये हा सर्व प्रकार रेकॉर्ड झाला आहे.
पोलीस अधीक्षक योगेश कुमार यांनी स्वतःच्या कल्पनेतून वाहतूक शाखेच्या कर्मचाऱ्याचे संरक्षण म्हणून, वर्दीवर कॅमेरा बसवण्याचा देखील निर्णय घेतला आहे. कॅमेरा वर्दीवर बसण्यापुर्वीच प्रवाशांचे गुप्त कॅमेरे पोलिसांचा अभद्र चेहरा लोकांसमोर आणत आहेत. प्रवाशांच्या कॅमेऱ्याने पोलीस कर्मचाऱ्यांचा मुजोरपणा उघडा पाडला आहे. या प्रकारचा व्हिडीओ व्हायरल झाल्याने जिल्ह्यात वाहतूक शाखेचे पोलीस कर्मचारी चर्चेत आले आहेत.
नव्याने रुजू झालेले पो. नि चिंचोळकर यांनी वाहतुकीला शिस्त लावतानाच कर्मचाऱ्यांना देखील शिस्त लावण्याची गरज आहे. केवळ कारवाईचा आकडा आणि दंड वाढवून उपयोग होणार नाही. आता पोलीस अधीक्षक योगेश कुमार अन पो.नि चिंचोळकर अशा कर्मचाऱ्यावर काय कारवाई करतात याकडे सर्वांचे लक्ष लागले आहे.
