हिंगोली- जिल्ह्यात तीन दिवसांपासून पावसाची संततधार सुरू आहे. तर कालपासून मुसळधार पावसाने हजेरी लावल्याने कळमनुरी तालुक्यातील सालेगाव-सांडस रस्त्यातील ओढ्यावरील पूल वाहून गेल्यामुळे या मार्गावरील वाहतूक विस्कळीत झाली आहे. त्यामुळे या मार्गावरील अनेक गावांचा संपर्क तुटला आहे.
जिल्ह्यात मागील आठ दिवसांपासून पावसाची संततधार सुरू आहे. मात्र, एक दिवसाच्या विश्रांतीनंतर पुन्हा दोन दिवसांपासून पावसाने जोर धरला आहे. त्यामुळे जिल्ह्यात सर्वत्र पाणीच पाणी झाले आहे. मुसळधार पावसामुळे कयाधू नदीला बऱ्यापैकी पाणी आल्याने नदीचे पात्र दुथडी भरून वाहत आहे.
जिह्यात तालुकानिहाय झालेला पाऊस
हिंगोलीत ४७. १४ मि. मी , कळमनुरी ७१. ३३ मि. मी, सेनगाव ५४. ३३ मि. मी, वसमत ५०. २९ मि. मी, ओंढा नागनाथ ५३.५० मि. मी नोंद प्रशासनाकडे झाली आहे. आज पावसाची सरासरी ३२५.५७ मि. मी एवढी नोंद झाली आहे. वार्षिक सरासरीच्या आज ३६.४७ टक्के पावसाची नोंद झाली आहे. तर मागील वर्षी सरासरी ४९.८० टक्के पाऊस झाला होता. आज रोजी जिल्ह्याला ६९.५२ टक्के पाऊस अपेक्षित आहे. मात्र या पावसामुळे खरिपाच्या पिकांचे नुकसान होण्याचे टळले आहे. तसेच पावसामुळे नदी नाले दुथडी भरून वाहत असल्याने, विहीर व बोअरच्या पाणी पातळीत वाढ होण्यास मदत झाली आहे.
